يسەكەشەۆ استانالىقتارعا بۇرقاسىندا ۇيدەن شىقپاۋعا كەڭەس بەردى

استانا. قازاقپارات - ەلوردا اكىمى اسەت يسەكەشەۆ استانالىقتار مەن قالا قوناقتارىنا اۋا رايىنىڭ بۇزىلۋىنا بايلانىستى ۇيدەن شىقپاۋعا كەڭەس بەردى.

شاھار باسشىسى بۇل تۋرالى ءوزىنىڭ فەيسبۋك پاراقشاسىندا جازدى، دەپ حابارلايدى «قازاقپارات» ح ا ا ءتىلشىسى.

«قۇرمەتتى استانالىقتار مەن قالا قوناقتارى! اۋا رايىنىڭ قولايسىزدىعىنا بايلانىستى توتەنشە جاعدايلاردىڭ الدىن-الۋ ماقساتىندا كوشەدە بارىنشا اباي بولۋدى سۇرايمىز. اسا قاجەتتىلىك بولماسا، مۇمكىندىگىنشە ۇيدەن شىقپاۋعا كەڭەس بەرەمىز. بۇرقاسىن جەل بولعان جاعدايدا دالادا قالعان بولساڭىز، قاۋىپسىزدىك شارالارىن ساقتاۋلارىڭىز قاجەت»، - دەپ جازادى اسەت يسەكەشەۆ.

قالا اكىمى ءوزىنىڭ جازباسىندا قۇرىلىس الاڭدارىنان اۋلاق ءجۇرىپ، جارناما ىلىنگەن تاقتالاردان ساقتانىپ، ەلەكتر سىمدارى مەن اعاشتاردان اينالىپ ءوتۋ كەرەكتىگىن اتاپ ءوتتى.

«توتەنشە جاعدايلار دەپارتامەنتى كەز كەلگەن جاعدايدا 112 نومىرىنە حابارلاسۋدى سۇرايدى. ءدال قازىر قالاداعى بارلىق كوممۋنالدىق قىزمەتتەر كۇشەيتىلگەن تارتىپتە جۇمىس ىستەۋدە»، - دەلىنگەن قالا اكىمىنىڭ جازباسىندا.

ەسكە سالا كەتسەك، كەشە قازگيدرومەتكە سىلتەمە جاساعان قالا اكىمىنىڭ سايتىندا حابارلانعانىنداي، استانادا قار بۇرقاسىنى 3 كۇنگە سوزىلادى. 11- قاڭتارعا ارنالعان بولجام بويىنشا كوشپەلى بۇلت ءجۇرىپ، قار جاۋادى، بوران سوعىپ، كوكتايعاق بولادى.

سينوپتيكتەردىڭ بولجاۋىنا قاراعاندا، 12- قاڭتار كۇنى بۇرقاسىننىڭ بەتى قايتا باستايدى. باتىستان، سولتۇستىك- باتىستان سەكۋندىنا 9-14 مەترلىك جەل سوعىپ، تۇندە اۋا تەمپەراتۋراسى -11.. .13 گرادۋسقا دەيىن تومەندەيدى.