پرەمەر-مينيستر ءاربىر قازاقستاندىققا تيەسىلى باسپانانىڭ كولەمىن ارتتىرۋدى تاپسىردى

استانا. قازاقپارات - اتالعان مىندەت ق ر پرەزيدەنتى نۇرسۇلتان نازاربايەۆتىڭ بيىلعى جولداۋىندا كورسەتىلگەن، دەپ حابارلايدى قازاقپارات ءتىلشىسى.

«مەملەكەت باسشىسىنىڭ تاپسىرماسى بويىنشا 2030-جىلعا دەيىن ءاربىر قازاقستاندىقتى تۇرعىن-ۇيمەن قامتۋ كورسەتكىشىن 30 شارشى مەترگە ارتتىرۋعا قاتىستى ۇسىنىستاردى ءبىر ايدىڭ ىشىندە بەرۋدى تاپسىرامىن. كەرەك بولسا «نۇرلى جەر» باعدارلاماسىنا ءتيىستى وزگەرىستەردى ەنگىزەيىك»، - دەپ اتاپ كورسەتتى باقىتجان ساعىنتايەۆ ۇكىمەتتىڭ بۇگىنگى وتىرىسىندا.

بۇدان بولەك، پرەمەر-مينيستر قالا قۇرىلىسى مەن جوبالاۋ بارىسىندا جاڭا ادىستەردى، زاماناۋي ماتەريالداردى قولدانۋعا باسا نازار اۋدارىپ، عيماراتتاردىڭ ەكولوگيالىق تازالىعىنا جانە ەنەرگيالىق تيىمدىلىگىنە جوعارى تالاپ قويۋ قاجەتتىگىن جەتكىزدى. «بۇدان بولەك، سالىناتىن جانە سالىنعان نىسانداردى ينتەللەكتۋالدى باسقارۋ جۇيەلەرىمەن جابدىقتاۋ تەتىكتەرىن ازىرلەۋ كەرەك. بۇنىڭ بارلىعىنا مينيستر قاسىمبەك جاۋاپتى بولادى»، - دەدى ب. ساعىنتايەۆ.

ايتا كەتەيىك، بيىلعى جولداۋدا ق ر پرەزيدەنتى نۇرسۇلتان نازاربايەۆ باسپانامەن قامتۋ كورسەتكىشىن ارتتىرۋدى تاپسىردى. «سوڭعى 10 جىلدا ءبىر تۇرعىنعا شاققاندا 30 پروتسەنتكە ءوسىپ، بۇگىندە 21,6 شارشى مەتردى قۇرادى. بۇل كورسەتكىشتى 2030-جىلى 30 شارشى مەترگە دەيىن جەتكىزۋ كەرەك»، - دەلىنگەن قۇجاتتا.