توتەنشە جاعداي كوميتەتى ەسكەرتەدى: الىس ساپارعا شىقپاڭىز

 استانا. قازاقپارات - ق ر ءى ءى م ت ج كوميتەتىنىڭ رەسمي وكىلى رۋسلان يمانقۇلوۆ تاياۋ كۇندەرى قازاقستان ازاماتتارىن جولعا شىقپاۋعا كەڭەس بەردى، دەپ حابارلايدى قازاقپارات.

«داۋىلدى الدىن الا ەسكەرتۋ شارالارى بولدى. بۇگىن جانە ەرتەڭ اۋا رايى قاتتى وزگەرەدى دەگەن مالىمەتتەر بار. وسى ورايدا قاۋىپسىزدىكتى ساقتاۋ اياسىندا ازاماتتارعا الىس ساپارعا شىقپاۋعا شاقىرامىز» ، - دەپ اتاپ ءوتتى رەسمي وكىل ورتالىق كوممۋنيكاتسيالار قىزمەتىندەگى بريفينگتە.

رۋسلان يمانقۇلوۆتىڭ سوزىنە قاراعاندا، ەلىمىزدىڭ سولتۇستىك جانە ورتالىق وڭىرلەرىندە اۋا رايى جاعدايى ناشارلاۋى مۇمكىن.

بۇدان بۇرىن حابارلانعانداي، قازاقستاندا الداعى كۇندەرى بوران سوعىپ، كوكتايعاق بولادى.

«رەسەيدىڭ ەۋروپالىق بولىگىنەن قازاقستانعا اتلانتيكالىق سيكلونمەن بايلانىستى اۋا اعىندارى جىلجىپ كەلەدى. الداعى ءۇش تاۋلىكتە رەسپۋبليكانىڭ كوپتەگەن وبلىسىنا الدىمەن جىلى، كەيىننەن سۋىق اۋا اعىندارى كەلەدى. كەي جەرلەردە قار جاۋىپ، بوران بولادى، جەل باتىستان سەكۋندىنا 15-23 مەتر جىلدامدىقپەن سوعادى، اۋا تەمپەراتۋراسى كوتەرىلىپ، كوكتايعاق بولادى» ، - دەلىنگەن حابارلامادا.

 

اۆتور:رۋسلان عابباسوۆ