پرەزيدەنت ايتقان ونكولوگيالىق ورتالىق استانادا سالىنۋى قاجەت - دوسقاليەۆ

استانا. قازاقپارات - اكادەميك جاقسىلىق دوسقاليەۆ مەملەكەت باسشىسى نۇرسۇلتان نازاربايەۆىڭ عىلىمي ونكولوگيالىق ورتالىقتى قۇرۋ تاپسىرماسىنا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«قازىرگى كەزدە الماتىدا ونكولوگيالىق عىلىمي- زەرتتەۋ ينستيتۋتى بار. ءبىراق بۇگىنگى زامان تالابىنا ساي جابدىقتالعان عىلىمي ورتالىقتى اشقان دۇرىس. ءالى ەسىمدە، اتالعان باستاما ءتورت- بەس جىل بۇرىن كوتەرىلگەن ەدى. ورتالىق ارنايى باعدارلاما اياسىندا استانادا سالىنادى دەگەن جوسپار دا بولدى. ءبىراق نەگە ەكەنىن بىلمەيمىن، سول جاعالاۋدا ونكولوگيا جانە ترانسپلانتولوگيا ۇلتتىق عىلىمي ورتالىعى دەپ اشتى»، - دەدى ج. دوسقاليەۆ قازاقپارات تىلشىسىنە بەرگەن سۇحباتىندا.

عالىمنىڭ ايتۋىنشا، ونكولوگيا عىلىمي ورتالىعىن بولەك سالعان ءجون. وعان قويىلاتىن تالاپ تا جوعارى بولۋى قاجەت. ال، ەڭ باستىسى، ورتالىقتى زامان تالابىنا ساي جابدىقتاۋ كەرەك.

 «قازىر ساۋلەلىك دياگنوستيكا، كيبەر- پىشاق، گامما- ساۋلە دەيدى، وسى ىسپەتتى قۇرال- جابدىقتار قاتەرلى ىسىككە قارسى ەم- دومدى ساپالى تۇردە جۇرگىزۋگە مۇمكىندىك بەرەدى. بۇگىندە ونكولوگيالىق اۋرۋلار بويىنشا ءدارى- دارمەكتەر جەتكىلىكتى. ەندى، تەحنيكالىق جاعىن كۇشەيتۋىمىز كەرەك. مەن ويلايمىن، ونكولوگيالىق ورتالىقتىڭ بولعانى دۇرىس. وعان كورشى ەلدەردىڭ ازاماتتارى كەلىپ، ەمدەلە الادى. ءسويتىپ، مەديتسينالىق تۋريزمدى دە دامىتامىز. وتكەندە بايگەنجين اباي قاباتاي ۇلى (ۇلتتىق عىلىمي مەديتسينالىق ورتالىقتىڭ باسشىسى - اۆت.) پرەزيدەنتپەن كەزدەسكەندە وسىنى ايتىپ، استانادا ۇكىمەتتىڭ قاراجاتىنا ەمەس، ينۆەستورلاردىڭ اقشاسىنا سالىنسا دەگەن ۇسىنىس جاساعان»، - دەپ اتاپ كورسەتتى ج. دوسقاليەۆ.

 ايتا كەتەيىك، پرەزيدەنت نۇرسۇلتان نازاربايەۆ بيىلعى جولداۋىندا عىلىمي ونكولوگيالىق ورتالىقتى قۇرۋ مىندەتىن بەلگىلەدى. «ونكولوگيالىق اۋرۋلارمەن كۇرەسۋ ءۇشىن كەشەندى جوسپار قابىلداپ، عىلىمي ونكولوگيالىق ورتالىق قۇرۋ قاجەت»، - دەلىنگەن «ءتورتىنشى ونەركاسىپتىك ريەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى مەملەكەت باسشىسىنىڭ جولداۋىندا.

اۆتور: ارمان اسقاروۆ