راۋل كاسترو قازاقستان پرەزيدەنتىنىڭ ساياسي كورەگەندىگىنە تاڭعالادى - كۋبا ەلشىسى
«پرەزيدەنت نۇرسۇلتان نازاربايەۆقا كۋبا ۇكىمەتى مەن حالقىنىڭ، ونىڭ ىشىندە كۋبا رەسپۋبليكاسى مەملەكەتتىك كەڭەسى مەن مينيسترلەر كەڭەسىنىڭ ءتوراعاسى، ارميا گەنەرالى راۋل كاسترونىڭ سالەمىن جەتكىزدىم. راۋل مىرزا قازاقستان پرەزيدەنتىمەن تانىس ءارى ونىڭ ستراتەگ، ۇلت كوشباسشىسى رەتىندەگى باتىلدىعى مەن ساياسي كورەگەندىگىنە تاڭعالادى، گاۆاناعا ساپارىن جىلىلىقپەن ەسكە الادى»، - دەدى سەنىم گراموتاسىن تاپسىرعاننان كەيىن ب ا ق وكىلدەرىنە سۇحبات بەرگەن ەلشى.
ەميليو پيەۆيدا پۋپو ەكى ەلدىڭ اراسى الشاق بولعانىمەن، حالىقتاردىڭ يگىلىگى ءۇشىن ءوزارا ءتيىمدى ىنتىماقتاستىقتى دامىتۋعا مول مۇمكىندىك بار ەكەندىگىن باسا ايتتى.
«وسىناۋ سالتاناتتى ساتتە كۋبا مەن قازاقستان اراسىنداعى ەكىجاقتى بايلانىستاردى نىعايتۋعا جىبەرىلگەن بۇعان دەيىنگى ەلشى جۇزەگە اسىرعان تاماشا جۇمىستاردى جالعاستىرۋدى ءوزىمنىڭ مىندەتىم سانايمىن. ەلشى بولۋدىڭ جاۋاپكەرشىلىك جۇگى اۋىر. ءبىراق، مەن ونى زور ريزاشىلىقپەن قابىلدايمىن. كۋبا قازاقستان تاۋەلسىزدىگىن ەڭ ءبىرىنشى مويىنداعان ەلدەردىڭ ءبىرى جانە تىعىز ديپلوماتيالىق قارىم-قاتىناس ورناتتى كۋبا ۇكىمەتى ءۇشىن قازاقستان رەسپۋبليكاسىمەن بۇل بايلانىستاردى دامىتۋ ايرىقشا ماڭىزعا يە. ءبىزدىڭ دەنساۋلىق ساقتاۋ، ءبىلىم، سپورت، مادەنيەت، بيوتەحنولوگيا، فارماتسيەۆتيكا سالالارىنداعى تاجىريبەمىز مول. ءبىز قازاق حالقىمەن جەتىستىكتەرىمىزدى زور قاناعاتتانۋشىلىقپەن بولىسەمىز»، - دەدى ول.
ايتا كەتەيىك، ەميليو پيەۆيدا پۋپودان سەنىم گراموتاسىن قابىلداعاننان كەيىن ەلباسى نۇرسۇلتان نازاربايەۆ قازاقستان كۋبا مەملەكەتىمەن ەكىجاقتى ىنتىماقتاستىق اياسىن كەڭەيتۋگە مۇددەلى ەكەندىگىن ايتقان بولاتىن.
«سوڭعى جىلدارى قازاقستان- كۋبا قارىم- قاتىناستارى ايتارلىقتاي جاندانىپ كەلە جاتىر. مەن 2017-جىلدىڭ ساۋىرىندە العاش رەت كۋباعا رەسمي ساپارمەن باردىم. كۋبا باسشىلىعىمەن وتكەن كەلىسسوزدەر بارىسىندا ءبىز ەكى ەلدىڭ اراسىنداعى ىنتىماقتاستىقتىڭ جاڭا پەرسپەكتيۆالارىن انىقتادىق. ەلدەرىمىزدىڭ ساۋدا ەكونوميكالىق ساياسي ىنتىماقتاستىعىن نىعايتۋ ءۇشىن ناقتى جۇمىستاردى جالعاستىرۋ قاجەت»، - دەدى نۇرسۇلتان نازاربايەۆ.
