نۇرسۇلتان نازاربايەۆ شەتەل ەلشىلەرىنەن سەنىم گراموتاسىن قابىلدادى - فوتو

استانا. قازاقپارات - بۇگىن اقوردادا قازاقستان پرەزيدەنتى نۇرسۇلتان نازاربايەۆ ءبىرقاتار شەتەل ەلشىسىنەن سەنىم گراموتاسىن قابىلدادى، دەپ حابارلايدى قازاقپارات.

اتاپ ايتقاندا، ەلباسىنا قازاقستانداعى شۆەد كورولدىگىنىڭ ەلشىسى ماتس فويەر، كۋبا رەسپۋبليكاسىنىڭ ەلشىسى ەميليو پيەۆيدا پۋپو، ءۇندىستان رەسپۋبليكاسىنىڭ ەلشىسى پرابحات كۋمار، ۇلىبريتانيا جانە سولتۇستىك يرلانديا بىرىككەن كورولدىگىنىڭ ەلشىسى مايكل دجون گيففورد سەنىم گراموتاسىن تابىستادى.

 

«بۇگىن سىزدەردىڭ قازاقستانداعى ديپلوماتيالىق ميسسيالارىڭىز رەسمي تۇردە باستالادى. وسى ايتۋلى كۇنگە وراي بارشاڭىزدى جاڭا قىزمەتتەرىڭىزبەن قۇتتىقتايمىن. جاۋاپتى ءارى مارتەبەلى ميسسيالارىڭىزدا ەلدەرىمىزدىڭ اراسىنداعى ىنتىماقتاستىقتى جان-جاقتى دامىتۋعا سەرپىن تيگىزەدى دەپ سەنەمىن»، - دەدى ەلباسى.

 

مەملەكەت باسشىسى ديپلوماتتاردىڭ جۇمىستارى قىزىقتى جانە جاۋاپتى كەزەڭگە تۇسپا- تۇس كەلىپ وتىرعاندىعىن باسا ايتتى.

 

«بۇگىندە الەم جاھاندىق وزگەرىستەر قارساڭىنا ءتۇستى. جاڭا تەحنولوگيالار الەم ەلدەرى ەكونوميكاسىنىڭ باسەكەگە قابىلەتتىلىگىن، ادامنىڭ ءومىر سالتىن وزگەرتەدى. سوندىقتان قازاقستان حالقىنا «ءتورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىمدى جاريالادىم.

مەن ەكونوميكانى، الەۋمەتتىك سالانى، سونداي- اق مەملەكەتتىك باسقارۋ ءىسىن دامىتۋدىڭ نەگىزگى باعىتتارى بويىنشا ناقتى 10 مىندەت قويدىم. بۇل مىندەتتەردى شەشۋ زاماناۋي تەحنولوگيالاردى پايدالانۋدى كوزدەيدى. جاڭا سيفرلىق داۋىرگە تابىستى بەيىمدەلۋ، وزىق دامىعان 30 ەلدىڭ قاتارىنا قوسىلۋ ماسەلەسىنە كومەكتەسەدى. سول ءۇشىن بىزدە «سيفرلىق قازاقستان» مەملەكەتتىك باعدارلاماسى قابىلدانىپ، ىسكە اسىرىلىپ جاتىر. ول ەكونوميكا مەن تىرشىلىكتىڭ بارلىق سالاسىن قامتيدى»، - دەدى نۇرسۇلتان نازاربايەۆ.