قازاقستاندا ەر ازاماتتار دا جاپپاي پلاستيكالىق وتا جاساتۋعا كوشكەن
قازاقستاندا قىز-كەلىنشەكتەردى بىلاي قويىپ، ەر ازاماتتار دا جاپپاي پلاستيكالىق وتا جاساتقاندى ادەتكە اينالدىرىپ بارا جاتقان كورىنەدى.
ساحنادا جارقىراپ جۇرەتىن جۇلدىزدار عانا ەمەس، قاراپايىم جىگىتتەر دە جۇزدەرىنە كۇتىم جاساۋدى قۇپ سانايدى. پلاستيكالىق وتانىڭ كومەگىنە كىمدەر جۇگىنىپ ءجۇر؟! قازاق جىگىتتەرىنىڭ قاي مۇشەسىنە كوڭىلى تولمايدى؟ بۇل تۋرالى 31 -ارنا حابارلايدى.
شوۋ بيزنەسپەن قوشتاسىپ، بيزنەسمەن بولىپ كەتكەن شوقان مارات ۇلى ءوز جاسىنان الدەقايدا جاس كورىنەدى. ەستراداداعى انىمەن، سىمباتتى سانىمەن ميلليونەر رايىمبەك باتالوۆتىڭ قىزىنىڭ جۇرەگىن جاۋلاپ العان شوقان بەتىنە قازىردىڭ وزىندە بيورەۆيتاليزاتسيا جاساپ، ياعني بەتىن تومپايتىپ ۇلگەرىپتى.
دەسە دە جىگىتتەر اقىرىن كۇتپەي-اق كەلىستى كەلبەت ءۇشىن پلاستيكالىق حيرۋرگتاردىڭ كومەگىنە اسىعاتىن بولىپ العان. ولار كوبىنەسە پلاستيكالىق وتا ارقىلى بەتىنىڭ تىرتىعىن جوق قىلىپ، مۇرنىن تۇزەتىپ، قۇلاعىن كىشىرەيتكىسى كەلەدى.
«اسىرەسە قازاق جىگىتتەرى كوپ كەلەدى بىزگە. سىعىرايعان كوزدى ۇلكەيتىپ بەرىڭىز، اجىمدەرىمىزدى كەتىرىڭىز دەگەن سۇراقتارمەن كوپ كەلەدى. ەرىندى ءبىز ۇلكەيتەمىز. ەر ازاماتتارعا بەتىن تارتامىز. يەكتىڭ استىنداعى مايدى سورامىز. جانە دە مىسالى جامباس اينالاسىنداعى جۇمساق تىندەردى ۇلكەيتەتىن دە وپەراتسيالار جاسايمىز. بۇل ەندى مەنىڭشە جاقسى تەندەنسيا. ۇيالاتىن ەشتەڭە جوق دەپ ويلايمىن»، - دەيدى پلاستيكالىق حيرۋرگ اينا دوسان.
ال حالىق الدىندا قاشاندا ەر مىنەزىمەن ەرەكشەلەنۋگە تىرىساتىن ءانشى سەرىكبول سايلاۋبەك ءتۇرىن تۇزەگىسى كەلەتىن ەركەكتەردى ەرىككەندەر دەپ ەسەپتەيدى ەكەن.
«الپىس كۇن اتان بولعانشا، التى كۇن بۋرا بولىپ كىسىنەپ ولگەنىڭ ارتىق. ايەل بالاسىنا حيرۋرگيالىق پلاستيكالىق وپەراتسيا جاراساتىن شىعار. ءبىراق ەر ازاماتقا ومىرىندە ءبىر اق رەت حيرۋرگيا كەرەك. سۇندەتكە وتىرعىزعان كەزدە. كوردىڭ بە؟! ەر ازامات ءسال مايمىلدان ءسال ادەمى بولساق بولدى ەمەس پا؟! ەڭ باستىسى ىشكى جان دۇنيەڭ باي بولعان دۇرىس تا؟!»، - دەيدى ءانشى سەرىكبول سايلاۋبەك.
انادان تۋعانداي تەرىڭىزدى جاسارتامىز، ارتىق مايىڭىزدى الىپ تاستاپ سىمباتتى قىلامىز دەپ، جارناماسى جەر جارىپ جاتقان كلينيكالار از ەمەس بۇگىندە. دەگەنمەن كارىلىكپەن كۇرەسكەندەر ءوز جۇمىسىنا ەشقانداي كەپىلدىك بەرمەيتىنىن ۇمىتپاعان ءجون.
