ەلباسى: جولداۋ ءتورتىنشى ونەركاسىپتىك ريەۆوليۋتسيا جاعدايىنداعى قازاقستان دامۋىنا ارنالادى

استانا. قازاقپارات - مەملەكەت باسشىسى نۇرسۇلتان نازاربايەۆتىڭ قازاقستان حالقىنا ارنالعان بيىلعى جولداۋى قازاقستاننىڭ ءتورتىنشى ونەركاسىپتىك ريەۆوليۋتسيا جاعدايىنداعى دامۋىنا ارنالادى.

بۇل تۋرالى بۇگىن ق ر پرەزيدەنتى ن. نازاربايەۆ رەسپۋبليكالىق تەلەارنالار ەفيرىندەگى مالىمدەمەسىندە ايتتى، دەپ حابارلايدى قازاقپارات ءتىلشىسى.

«قازاقستان الەمدەگى ءتۇرلى سىناقتارعا توتەپ بەرىپ، قارقىندى ەكونوميكالىق دامۋ جولىنا بەت الدى. ەلىمىزدىڭ 2050- جىلعا دەيىنگى ۇزاق مەرزىمدى دامۋ ستراتەگياسى جۇزەگە اسىرىلۋدا. 100 ناقتى قادام ۇلت جوسپارى اياسىندا ءبىز رەفورمالاردى جۇرگىزىپ كەلەمىز. يندۋستريالاندىرۋ سالاسىن وركەندەتۋ ءۇشىن جۇيەلى جۇمىستار اتقارىلۋدا. ءبىز كونستيتۋتسيالىق رەفورمانى جۇزەگە اسىرىپ، ەلىمىزدىڭ ءۇشىنشى جاڭعىرۋىن باستادىق. رۋحاني جاڭعىرۋ باعىتى بويىنشا كەشەندى ءىس- شارالار جۇرگىزىلۋدە. «سيفرلىق قازاقستان» باعدارلاماسى قابىلداندى»، - دەدى دەدى پرەزيدەنت ءوز مالىمدەمەسىندە.

تەلەارنا ەفيرىندەگى مالىمدەمەدە مەملەكەت باسشىسى ادامزات بالاسىنىڭ جاڭا ونەركاسىپتىك ريەۆوليۋتسيا داۋىرىنە قادام باسقانىن جانە زاماناۋي تەحنولوگيالاردىڭ الەمدى وزگەرتىپ جاتقانىن اتاپ ءوتتى.

«جاھاندىق تەحنولوگيالىق وزگەرىستەرگە جاڭا سىن- قاتەرلەرمەن قاتار وسۋگە ارنالعان جاڭا مۇمكىندىكتەر دە ءتان. بۇل - الەمنىڭ دامىعان 30 ەلىنىڭ قاتارىنا جەدەلدەتىپ ەنۋىمىزگە ارنالعان تاريحي مۇمكىندىگىمىز. ەرتەڭ مەنىڭ قازاقستان حالقىنا ارنالعان جىل سايىنعى جولداۋىم جاريالانادى. جولداۋ ەلىمىزدىڭ ءتورتىنشى ونەركاسىپتىك ريەۆوليۋتسيا جاعدايىنداعى دامۋىنا ارنالىپ وتىر»، - دەدى ەلباسى.