تار زامانداعى قازاقتاردىڭ ەۆرەيلەرگە كومەگى تۋرالى ۇزدىك اڭگىمە اۆتورى يزرايلگە بارادى
دەپ حابارلايدى «قازاقپارات» ح ا ا ءتىلشىسى، ەلشىلىكتىڭ باسپا ءسوز قىزمەتىنە سىلتەمە جاساپ.
«يزرايل مەملەكەتىنىڭ 70 جىلدىعىنا وراي، وسى ەلدىڭ قازاقستانداعى ەلشىسى «العىس» جوباسىن ۇيىمداستىرادى. ءبىز قازاق حالقىنىڭ ەۆرەيلەرگە وتكەن عاسىردىڭ 30-40 -جىلدارى قالاي كومەكتەسكەنى تۋرالى وقيعالار تاريحىن جينايمىز. تاعدىر تالكەگىمەن كەلگەن ادامدارعا جەرگىلىكتى تۇرعىنداردىڭ كومەك قولىن سوزىپ، قوناقجايلىق كورسەتۋىن ەۆرەي حالقى ەشقاشان ۇمىتپاق ەمەس»، - دەپ جازادى يزرايل ەلشىلىگى وزدەرىنىڭ Facebook پاراقشالارىنا.
وقيعالار مەن اڭگىمەلەردى ءماتىن، ۆيدەو، اۋديو نەمەسە فوتورەپورتاج كۇيىندە algys_story@mail.ru پوچتاسىنا جىبەرۋگە بولادى (وقيعانىڭ شىنايىلىعىن دالەلدەۋ ماقساتىندا سۋرەتتەر مەن قۇجاتتار حاتپەن قوسا جىبەرىلۋى كەرەك).
«قازاقستانداعى العىس كۇنى، ياعني 1 - ناۋرىزدا ءبىز ەڭ ۇزدىك اڭگىمە اۆتورىنىڭ ەسىمىن اتايمىز. جەڭىمپاز يزرايلگە بارادى»، - دەپ حابارلادى ەلشىلىكتەن.
