ب ۇ ۇ ق ك: قازاقستان حالىقارالىق قوعامداستىق مۇشەلەرى اراسىنداعى سەنىمدى قالپىنا كەلتىرۋگە تىرىسادى
وسى ايدا وتەتىن قاۋىپسىزدىك كەڭەسىنىڭ وتىرىسىنا قازاقستان پرەزيدەنتى نۇرسۇلتان نازاربايەۆ، ق ر سىرتقى ىستەر ءمينيسترى قايرات ءابدىراحمانوۆ جانە ونىڭ رەسەيلىك ارىپتەسى سەرگەي لاۆروۆ پەن وزگە دە رەسمي وكىلدەر قاتىساتىن بولادى.
«ءاۋ باستا، ءبىز قاۋىپسىزدىك كەڭەسىنىڭ تۇراقتى ەمەس مۇشەسى بولىپ جۇرگەن كەزىمىزدە، ءار ءتۇرلى ەلدەردى بۇگىنگى كۇنگى وزەكتى ماسەلەلەرى شەشىمى تابىلاتىن ورتاق پلاتفورماعا بىرىكتىرۋ، ىمىرالى نۇسقانى ىزدەۋشى ەل رەتىندە ءوز ءرولىمىزدى بەلگىلەپ قويدىق»، - دەيدى قايرات وماروۆ.
قاۋىپسىزدىك كەڭەسىندەگى قازاقستاننىڭ باسىم ۇستانىمى قازاقستان پرەزيدەنتىنىڭ ب ۇ ۇ قاۋىپسىزدىك كەڭەسىنە جولداعان «ءقاۋىپسىز، ءادىل جانە وركەندەگەن الەم قۇرۋ ءۇشىن جاھاندىق ارىپتەستىكتى نىعايتۋ جونىندەگى قازاقستاننىڭ تۇجىرىمدامالىق كوزقاراسى» ساياسي ۇندەۋىندە دە تۇجىرىمدالىپ، بەلگىلەنگەن بولاتىن.
«قازاقستان پرەزيدەنتىنىڭ ساياسي ۇندەۋى قاۋىپسىزدىك كەڭەسىنىڭ رەسمي قۇجاتىنا اينالىپ، كەڭەس مۇشەلەرىنە تاراتىلدى. سوندىقتان، ءبىز بۇگىن ءدال وسى باسىمدىقتاردى ۇستانامىز»، - دەدى قايرات وماروۆ قاڭتار ايىندا.
قازاقستاننىڭ باستاماسىمەن ب ۇ ۇ- نىڭ تاريحىندا قاۋىپسىزدىك كەڭەسىنىڭ سايلانعان تۇراقتى ەمەس التى مۇشەسىنىڭ تۋىن تۇڭعىش رەت سالتاناتتى تۇردە كوتەرۋ ءراسىمى ۇيىمداستىرىلعان.
«ءبىز ب ۇ ۇ- نىڭ جاڭا ءداستۇرىن باستاپ بەرۋگە تىرىستىق. مەنىڭ ويىمشا، مۇنىڭ سيمۆوليكالىق تۇرعىدا ماڭىزى تەرەڭ، سەبەبى قاۋىپسىزدىك كەڭەسىنىڭ مۇشەلىگىنە سايلانۋ تۇراقتى نەگىزدە بولماسا دا، ول - ۇلكەن قۇرمەت، جاۋاپكەرشىلىك پەن ارتىلعان ۇلكەن سەنىم»، - دەيدى ول.
قازاقستان ءۇشىن ماڭىزدى ءۇش شارا وتكەلى جاتىر. اتاپ ايتقاندا، 18- قاڭتاردا جاپپاي قىرىپ-جويۋعا ارنالعان قارۋلاردى تاراتپاۋ جانە سەنىم شارالارى تاقىرىبىندا جوعارعى مازمۇندى تەماتيكالىق دەبات وتكىزۋ جوسپارلانعان. اتالعان وتىرىستا قر پرەزيدەنتى نۇرسۇلتان نازاربايەۆ ءتوراعالىق ەتەتىن بولادى. كۇتىلىپ وتىرعانىنداي، ول جيىنعا باسقا ەلدەردىڭ مەملەكەت باسشىلارى مەن سىرتقى ىستەر مينيسترلەرى قاتىسپاق.
«ءبىز قاقتىعىستاردىڭ الدىن الۋ جانە بەيبىتشىلىكتى ساقتاۋ ماسەلەلەرىن تالقىلايتىن بولامىز. بۇل تاقىرىپ مەملەكەت باسشىسىنىڭ «مانيفەست. الەم. 21-عاسىر» اتاۋلى باعدارلامالىق قۇجاتىمەن، سونىمەن قاتار تەڭ قۇقىقتىق جانە ءوزارا ءتيىمدى سەرىكتەستىك قاعيداتتارىنا نەگىزدەلگەن باسىم باعىتتارمەن، حالىقارالىق قۇقىقتى ۇستانۋ جانە سىيلاۋمەن، ديپلوماتيالىق جول ارقىلى كەز كەلگەن قاقتىعىستى شەشۋ جولىمەن دالمە-ءدال ۇندەسەدى»، - دەيدى قايرات وماروۆ.
ۇلكەن تاقىرىپتىڭ ەكىنشىسى - ءوزارا تاۋەلدىلىك، قاۋىپسىزدىك پەن دامۋ مودەلى بويىنشا اۋعانستان مەن ورتالىق ازيادا ايماقتىق ىنتىماقتاستىق ورناتۋ. قازاقستان اتىنان بۇل تۇرعىدا سىرتقى ىستەر ءمينيسترى قايرات ءابدىراحمانوۆ قاتىسىپ، اتالعان شاراعا ءتوراعالىق ەتپەك. ول جيىنعا اۋعانستان مەن ورتالىق ازيا ەلدەرىنىڭ سىرتقى ىستەر مينيسترلەرى قاتىسادى دەپ كۇتىلۋدە.
«18 جانە 19- قاڭتاردا وتەتىن ەكى شارادا دا نەگىزگى بايانداماشى رەتىندە بۇۇ باس حاتشىسى گۋتەرريش ءسوز سويلەيتىن بولادى. ءبىز سونىمەن بىرگە، ول وتىرىستارعا رەسەيدىڭ سىرتقى ىستەر ءمينيسترى لاۆروۆ تا قاتىسادى دەپ كۇتۋدەمىز»، - دەيدى وماروۆ.
سونىمەن بىرگە، 25- قاڭتاردا تاياۋ شىعىس جانە پالەستينا ماسەلەسىنە قاتىستى تاقىرىپتار بويىنشا توقسانارالىق اشىق دەبات ۇيىمداستىرۋ كوزدەلگەن.
«ءبىز ءۇشىن باستى باعىتتاردىڭ ءبىرى، ول البەتتە، استانا پروتسەسى، سيريا ماسەلەسى جونىندەگى كەلىسسوزدەر»، - دەگەن ب ۇ ۇ- داعى قازاقستاننىڭ تۇراقتى وكىلى بۇل باعىتتا بارىنشا كۇش سالىپ جاتقان مەملەكەتتەرگە العىسىن ءبىلدىردى.
«استانا پروتسەسىنە قاتىسىپ وتىرعان نەگىزگى مەملەكەتتەر - رەسەي، تۇركيا مەن يران. سونىمەن بىرگە، امەريكا قۇراما شتاتتارى مەن يوردانيا تاراپىنان باستامالار بار، ولار دا بۇل ماسەلەنى رەتكە كەلتىرۋدە كومەك بەرۋگە تىرىسىپ جاتىر. بۇدان باسقا دا الاڭدار، ماسەلەن، ماسكەۋلىك الاڭ، كابۋل پروتسەسى، ىستانبۇل پروتسەسى بار. سونىمەن قاتار، البەتتە، جەنيەۆالىق الاڭنىڭ جۇمىسى قارقىندى - استانالىق جانە جەنيەۆالىق الاڭ ءبىرىن- ءبىرى ءوزارا تولىقتىرۋ نەگىزىندە جۇمىس ىستەپ جاتىر»، - دەيدى قايتار وماروۆ.
قازاقستاننىڭ ءتوراعالىعى بارىسىندا تاعى ءبىر باسىمدىق بەلسەندى تۇردە تالقىلاناتىن بولادى - ول افريكاداعى ماسەلەلەر. افريكالىق قۇرلىققا قاتىستى سۇراقتار مەن بارلىق بىتىمگەرلىك ارەكەتتەر قاراستىرىلادى.
