كاسپي سۋىنىڭ قىزىل تۇسكە نەگە بويالعانى بەلگىلى بولدى

اقتاۋ. قازاقپارات - سوڭعى كۇندەرى اقتاۋ قالاسىنىڭ تۇرعىندارى تەڭىز سۋىنىڭ شامالى بولىگىنىڭ قىزىل تۇسكە بويالعانىن بايقاعان. بۇعان كاسپيدەگى سۋ استى بالدىرلارى سەبەپ بولعان،

دەپ حابارلايدى قازاقپارات ءتىلشىسى.

بۇل تۋرالى ماڭعىستاۋ وبلىستىق ەكولوگيا دەپارتامەنتى باسشىسىنىڭ ورىنباسارى رۋسلان تۇكەنوۆ ايتتى.

ونىڭ ايتۋىنشا، زەرتتەۋ- ساراپتاما ءبولىمىنىڭ ماماندارى تەڭىز سۋى جانە بالدىر سىناماسىن الىپ، قازىر تالداۋ جۇمىستارىن جۇرگىزىپ جاتىر.

«قىزىل بالدىردىڭ سۋعا قىزىل رەڭ بەرىپ تۇرعانى وڭاي بايقالادى. ءتۇسى وزگەرگەن سۋ كولەمى قالانىڭ 1- شاعىن اۋدانىندا ورنالاسقان «شاعالا» قوناقۇيىنەن پريمورسكي تۇرعىن ءۇي اۋماعىنا دەيىن 2 شاقىرىمعا سوزىلادى. ودان كەلەر ەشقانداي قاۋىپ جوق. كادىمگى تابيعي قۇبىلىس. داۋىل تۇرعان كەزدە قىزىل بالدىر جاعاعا جينالادى»، - دەدى رۋسلان تۇكەنوۆ.

قىزىل بالدىرلار تەڭىزدەردە سۋ استى جارتاستارىنا، ريفتەرگە، ۇلكەندى- كىشىلى دومالاق، قيىرشىق تاستارعا، قۇمعا، ال مايدا تۇرلەرى ءىرى بالدىرلارعا جابىسىپ وسەدى.

نەگىزىنەن 20 - 40 م، ال قولايلى جاعدايلاردا 100 - 200 م تەرەڭدىكتە وسەدى. كەيبىر تۇرلەرى عانا تۇشى سۋلاردا كەزدەسەدى. 2 كلاسقا (بانگيا، فلوريديا)، 600-دەن اساتىن تۋىسقا جاتاتىن 4 مىڭنان استام تۇرلەرى بار.

كاسپي تەڭىزىندە قىزىل بالدىردىڭ 25 ءتۇرى كەزدەسەدى.

 ەسكە سالا كەتەيىك، بۇعان دەيىن اقتاۋدا تەڭىز قىزىل تۇسكە بويالعاندىعى تۋرالى بۇعان دەيىن حابارلاعان بولاتىنبىز.