ترامپ شەتەلدىك كوشباسشىلار اراسىندا ءبىرىنشى رەت قازاقستان پرەزيدەنتىن اق ۇيدە قارسى الادى - قارين
قازاقستاننىڭ حالىقارالىق قاتىناستار كەڭەسىنىڭ ءتوراعاسى ەرلان قاريننىڭ ويىنشا، قازاقستان مەن ا ق ش- تىڭ پرەزيدەنتتەرى الدىمەن اۋعانستان ماسەلەسىن تالقىلايدى.
«امەريكا نۇرسۇلتان نازاربايەۆتىڭ ساپارىنا ۇلكەن ءمان بەرىپ وتىر. سەبەبى ا ق ش جاقىن ارادا اۋعانستانعا قاتىستى جاڭا ستراتەگيانى ازىرلەيمىز دەپ مالىمدەگەن بولاتىن. الايدا ونى ءالى تانىستىرعان جوق. مەنىڭشە، ەكى ەل باسشىلارى كەزدەسكەندە اۋعانستان ستراتەگياسىنا باسا نازار اۋداراتىن بولادى»، - دەدى ە. قارين بۇگىن استانادا جۋرناليستەرگە بەرگەن سۇحباتىندا.
ونىڭ ايتۋىنشا، بۇگىندە قازاقستان ب ۇ ۇ قاۋىپسىزدىك كەڭەسىنىڭ ءتوراعاسى عانا ەمەس، اتالعان ۇيىمنىڭ ءبىرقاتار كوميتەتتەرىنە دە جەتەكشىلىك ەتەدى. سونىڭ ىشىندە اۋعانستان مەن تاليبان جونىندەگى كوميتەت تە بار. سول سەبەپتى نازاربايەۆ پەن ترامپتىڭ كەلىسسوزدەرى كەزىندە اۋعانستان ماسەلەسىنە باسا نازار اۋدارىلادى.
«پرەزيدەنتىمىزدىڭ ا ق ش- قا جاسايتىن ساپارى - ماڭىزدى وقيعا. نەگىزى، دونالد ترامپ شەتەلدىك كوشباسشىلاردىڭ ىشىندە قازاقستاننىڭ پرەزيدەنتىن ءبىرىنشى بولىپ اق ۇيدە قارسى الادى. جالپى، الداعى ساپار ەكى ەل اراسىنداعى ىنتىماقتاستىقتىڭ باسىم باعىتتارىن عانا ەمەس، ا ق ش پەن ورتالىق ازيانىڭ ارىپتەستىگىن دە، ا ق ش- تىڭ وسى ايماقتاعى ءرولىن دە انىقتايدى»، - دەپ اتاپ كورسەتتى ە. قارين.
ساياسات تانۋشىنىڭ ايتۋىنشا، بۇگىندە الەم قاۋىمداستىعى قازاقستاندى يادرولىق قارۋسىزداندىرۋدىڭ كوشباسشىسى رەتىندە جاقسى بىلەدى. سوندىقتان ترامپەن كەزدەسۋ كەزىندە اتالعان ماسەلە دە تالقىعا سالىنادى.
ايتا كەتەيىك، وسى ايدا ق ر پرەزيدەنتى نۇرسۇلتان نازاربايەۆ ا ق ش- قا رەسمي ساپارمەن بارادى. 18 - قاڭتاردا نيۋ- يوركتە جاپپاي قىرىپ- جويۋ قارۋلارىن تاراتپاۋعا ارنالعان جوعارى دەڭگەيدەگى تاقىرىپتىق بريفينگ وتەدى. وعان ءبىرقاتار ەلدەردىڭ باسشىلارى مەن مينيسترلەرى قاتىسادى. بريفينگتە قازاقستان پرەزيدەنتى نۇرسۇلتان نازاربايەۆ ءسوز سويلەيدى دەگەن جوسپار بار. اتالعان شارا قازاقستاننىڭ بىرىككەن ۇلتتار ۇيىمىنىڭ قاۋىپسىزدىك كەڭەسىنە ءتوراعالىعى اياسىندا ۇيىمداستىرىلادى. ءتوراعالىق 31 - قاڭتارعا دەيىن جالعاسادى.
اۆتور: ارمان اسقاروۆ
