ءۇرىمجى تولىقتاي گاز جانە ەلەكتر قۋاتىنا كوشەدى

استانا. قازاقپارات - شىنجاڭ-ۇيعىر اۆتونوميالىق ولكەسىنىڭ اكىمشىلىك ورتالىعى ءۇرىمجى قالاسىندا جىلۋ كوزى رەتىندە تولىعىمەن تابيعي گاز بەن ەلەكتر پايدالانىلادى، دەپ حابارلايدى «شينحۋا» اگەنتتىگى.

قالا جىلۋ باسقارماسىنىڭ اقپاراتىنا سايكەس، كومىرمەن جۇمىس ىستەيتىن 19 مىڭنان استام جىلۋ قوندىرعىسى جىل سوڭىنا دەيىن تازا ەنەرگيا كوزدەرىن قولداناتىن قوندىرعىلارمەن الماستىرىلادى.

ءۇرىمجى كومىردى تابيعي گازعا الماستىرۋدى قالا شەتىندە 2012-جىلى باستاعان. بىلتىردان بەرى ۇرىمجىگە باعىناتىن اۋىلدىق جەرلەردە 32 مىڭ كومىر قازاندىعى جوندەلدى. بۇل قىس مەزگىلىندە كومىر شىعىنىن 183 مىڭ تونناعا، اۋاعا كۇكىرت قوس توتىعىن شىعارۋدى 2900 تونناعا، ءتۇتىن مەن كۇلدىڭ شىعارىلۋىن 7300 تونناعا دەيىن قىسقارتۋ مۇمكىندىگىن بەردى.

ءوڭىر مەكتەپتەردى، كاسىپورىندار مەن مەملەكەتتىك مەكەمەلەردى ەلەكترمەن جىلىتۋعا قارقىن بەرىپ كەلەدى. جىلىتۋ اۋماعى 7 ميلليون شارشى مەتردى قۇرايدى.