قازاقستاندىق شاڭعىشى «تۋر دە سكي» كەزەڭىندە جەڭىمپاز اتاندى

استانا. قازاقپارات - يتاليانىڭ ۆال-دي-فەممە قالاسىندا «تۋر دە سكي» كەزەڭىندە قازاقستاندىق الەكسەي پولتورانين جەڭىمپاز اتاندى، دەپ حابارلايدى «قازاقپارات» ءتىلشىسى.

الەم كۋبوگى كەزەڭى بولىپ سانالاتىن 15 كيلومەتر قاشىقتىقتا كلاسسيكالىق ادىسپەن كوپشىلىك جارىستا ا. پولتورانين بىردەن كوش باستاۋشىلاردىڭ قاتارىندا بولدى. سودان كەيىن 10 كيلومەترگە جاقىنداعاندا، قارقىندى ۇدەتىپ، العا شىقتى. ال مارەدە تاماشا جىلدامدىق كورسەتىپ، ءبىرىنشى بولىپ ءوتتى.

ايتا كەتەيىك، بۇل - ا. پولتورانيننىڭ بيىلعى ماۋسىمداعى ءۇشىنشى جۇلدەسى. بۇدان بۇرىن ول 17- جەلتوقسان كۇنى يتاليانىڭ توبلاح قالاسىندا الەم كۋبوگى كەزەڭىندە 15 كيلومەتر قاشىقتىقتا كلاسسيكالىق تاسىلمەن ىزگە ءتۇسىپ جارىسۋدا قولا جۇلدەگەر اتانسا، جاڭا جىل الدىندا لەنتسەرحايدەدە (شۆەيتساريا) «تۋر دە سكي» كەزەڭىندە كلاسسيكالىق ادىسپەن 15 كيلومەتر قاشىقتىقتا جۇگىرۋدە مارەگە ەكىنشى بولىپ جەتكەن بولاتىن.

وسىلايشا، الەكسەي پولتورانين وڭتۇستىك كورەيانىڭ پحەنچحان قالاسىندا وتەتىن قىسقى وليمپيادا ويىندارى قارساڭىندا ءوزىنىڭ بابىندا ەكەندىگىن دالەلدەپ كەلەدى.