استانادا جەر ۇيلەردىڭ ءبىرى ورتەندى

 استانا. قازاقپارات - بۇگىن استانادا جەكەمەنشىك ءۇي دۇكەنىمەن بىرگە ورتەندى. اتالمىش اقپاراتتى ق ر ءى ءى م توتەنشە جاعدايلار كوميتەتىنىڭ رەسمي وكىلى رۋسلان يمانقۇلوۆ راستادى، دەپ حابارلايدى «قازاقپارات» ح ا ا ءتىلشىسى.

 «بۇگىن 2018 -جىلدىڭ 6-  قاڭتارىندا، تاڭعى ساعات 9 دار شاماسىندا «كوكتال-2» شاعىناۋدانىندا ورنالاسقان جەر ۇيلەردىڭ ءبىرىنىڭ شاتىرىنان ءورت شىقتى. ءورت سوندىرۋشىلەردىڭ كۇشىمەن، ساعات 10:14 پەن 10:59 ارالىعىندا ءتىلسىز جاۋ تولىقتاي اۋىزدىقتالدى. ءورت شالعان اۋماق 150 شارشى مەتردى قۇرادى» ، - دەپ مالىمدەدى ول.

رەسمي وكىلدىڭ ايتۋىنشا، وقيعادان ەشكىم زارداپ شەككەن جوق. جالىندى سوندىرۋگە استانا قالاسى جەكە قۇرامىنىڭ 21 ادامى جۇمىلدىرىلىپ، مامانداندىرىلعان ءورت ءسوندىرۋشى 5 ارنايى تەحنيكا بىرلىگى تارتىلعان.

«كەلتىرىلگەن مالىمەتتەرگە سايكەس، ءورتتىڭ شىعۋىنا كومىرمەن جاناتىن پەش اقاۋى سەبەپ بولۋى مۇمكىن. ازاماتتاردى اباي بولۋعا شاقىرامىز. پەشتى قولدانعان كەزدە ساق بولىڭىزدار» ، - دەدى رۋسلان يمانقۇلوۆ.