ءجۇرسىن ەرمان مەن مۇحامەدجان تازابەكتىڭ توڭىرەگىنە توپتاسقان اقىندار ءبىر ساحنادا ايتىسقىسى كەلمەيتىن بولعان
ال سەبەپ - ءارتۇرلى. ءدىني كوزقاراسىنا بايلانىستى داستۇرگە قىرىن قاراي باستاعان اقىندار دا قازىر از ەمەس. ونى سول ايتىستىڭ باسى- قاسىندا جۇرگەندەر اشىق ايتا باستادى، دەپ حابارلايدى ك ت ك ارناسى.
دالا پارلامەنتىنە بالانعان ايتىس توڭىرەگىندە قازىر تالاس- تارتىس ءورشىپ تۇر. ءتول ونەردىڭ تونى تەرىس اينالىپ، توپ- توپقا بولىنگەن اقىندار اركىمنىڭ سويىلىن سوعىپ ءجۇر دەگەن اڭگىمە ەل اراسىندا جەلدەي ەسكەن. قىزىل ءسوزدىڭ شەشەندەرى حالىقتىڭ مۇڭ- مۇقتاجىن جىرلاۋدىڭ ورنىنا، ءبىر قازاندا باستارى پىسپەي جۇرگەنىن ءجۇرسىن ەرمان دا مويىندايدى. ءبىر ءۇيدىڭ بالاسىنداي بولعان دۇلدىلدەر قازىر ءبىر ساحنادا وتىرىپ ايتىسۋدان قالىپ بارادى.
«قازاقستان قوعامى قانداي، اقىندار دا سونداي. ءبىزدىڭ دە اقىنداردىڭ اراسىندا ءدىني تەرىس باعىتقا ءتۇسىپ كەتكەن، ءداستۇرلى ءوزىمىزدىڭ ءدىندى ۇستانبايتىن اقىندار پايدا بولدى، تورتەۋ- بەسەۋ. ءبىراق، ولاردىڭ قولىنا ايتىس سەكىلدى اسا قۇدىرەتتى ونەردىڭ تىزگىنىن ۇستاتىپ جىبەرىپ، ايتىستى دىنگە قاراي جولعا سالىپ جىبەرۋ وتە قيانات بولادى» ، - ءجۇرسىن ەرمان.
شىنىندا دا قازىر كەيبىر اقىنداردىڭ تەك ءدىن توڭىرەگىندە تولعانىپ، ايتىستىڭ اجارىن قاشىرىپ جۇرگەنى تۋرالى ايتىلىپ ءجۇر. ءتىپتى ساقالدىلار بىرىگىپ ءوز ايتىستارىن ۇيىمداستىراتىن بولعان دەيدى سول ايتىستىڭ باسى قاسىندا جۇرگەن اقىندار.
«ەگەر باسقاشا ويلايتىن ايتىسكەر- اقىندار بولسا، ەگەر جوق ءبىز بۇلارعا قوسىلماۋىمىز كەرەك، ءبىز بۇلاردىڭ قاتارىنان ەمەسپىز، ءبىز ءوزىمىز بولەكپىز دەيتىن بولسا، ونداي ادامدى تەك قانا ايتىسكەر اقىن ەمەس، جالپى قازاقستان مەملەكەتىنە قاۋىپتى ادام دەپ ەسەپتەيمىن. تازا ۇلتقا پايداسى بار وسىنداي قازاقتىڭ اردا ونەرى جالعىز قازىر قالعان قادىرلى كورەرمەن جيناي الاتىن ءداستۇرلى ونەرىنە جىك سالۋ ول قازاققا قارسى جاسالعان قىلمىس دەپ ويلايمىن» ، - دەيدى ايتىسكەر رينات زايىتوۆ.
وسىدان جەتى جىل بۇرىن ايتىس اقىندارى مەن جىرشى- تەرمەشىلەردىڭ حالىقارالىق وداعى قۇرىلىپ، وعان ءجۇرسىن ەرمان ءتوراعا بولىپ سايلانعانى ەستە. بۇل ۇيىم بەس مارتە «التىن دومبىرا» سايىسىن ۇيىمداستىرىپ، ۇزدىك اقىنداردى انىقتاعان ەكەن. الايدا حالىقتىڭ قىزىعۋشىلىعىن وياتقان بۇل جارىستان بيىل ءبىراز مىقتى اقىندار شەت قالىپتى.
««التىن دومبىرادان» ايىرىلىپ قالعان سوڭ، اقتوبەدە وتكەن وڭاشا، شامالى اقىندار قاتىسقان. بۇرىن ايتىسقا قاتىسپاعان بيىلعى جىلدىڭ، اقىندار اراسىندا وتكەن «التىن دومبىرا» سايىسى ءبىزدىڭ كوڭىلىمىزدى كونشىتپەدى. سوندىقتان، ءبىزدىڭ بىردە ءبىر وداقتىڭ مۇشەلەرى بارىپ قاتىسقان جوق» ، - دەيدى ءجۇرسىن ەرمان.
قازىر حالىق اراسىندا سارا توقتامىسوۆا، بالعىنبەك يماشيەۆ، سىرىم اۋەزحان، جانداربەك بۇلعاقوۆ سەكىلدى سايگۇلىكتەردىڭ مۇحامەدجان تازابەكتىڭ جانىنا توپتاسقانى تۋرالى اڭگىمە بار. ياعني جىر دۇلدىلدەرى جىككە ءبولىنىپ، ءجۇرسىن مەن مۇحامەدجاننىڭ سويىلىن سوعىپ ءجۇر دەيدى كوپشىلىك. ءبىراق، مۇحامەدجان تازابەكتىڭ ءوزى بۇل ويمەن تۇبەگەيلى كەلىسپەيدى.
«دىنگە بايلانىستى بولىنۋشىلىك ايتىستا بولعان ەمەس نەگىزىنەن. كوپ جاعدايدا دەگەن شىعار، سولاي شىعار، سولاي بولۋى مۇمكىن دەگەن جورامالدارمەن ەل اراسىندا سونداي تۇسىنىك قالىپتاسىپ قالدى. ايتپەسە، ايتىس توڭىرەگىندە بولىپ جاتقان داۋ دامايعا ءدىننىڭ ەش قاتىسى جوق نەگىزى» ، - دەيدى مۇحامەدجان تازابەك.
«ايتىس ول ورتاق ونەر. ول وڭاشا ءبىر بولمەدە، مىنە ويىمىز بىردەي التاۋىمىزدىڭ، وسى التاۋىمىز عانا بارىپ ايتىسامىز دەگەن بولمايدى. ءوزىنىڭ ويى دۇرىس پا، القاعا سالسىن ۇلكەن ورتاعا. ءبىز دە ايتىسكەر اقىنبىز، ءبىزدىڭ دە پىكىرىمىز بار. كىمدىكى دۇرىس، كىمدىكى بۇرىس ەكەنىن حالىق سول جەردە شاپالاعىمەن دە شەشىپ الادى عوي» ، - دەيدى ايتىسكەر رينات زايىتوۆ.
جىل بويى جىر بايگەسىندە قامشى سالدىرماعان اقىنداردىڭ بيىل «التىن دومبىرادان» الشاقتاپ قالعانى كوڭىلدەرىنە قاياۋ تۇسىرگەن. سوندىقتان ءجۇرسىن ەرمان جەلتوقساننىڭ 29 مەن 30-ىندا ءوز جۇيرىكتەرىن جيناپ الماتىدا ايتىس وتكىزدى. وسىلايشا قازاق ۇلتىنا ءتان ۇلتتىق ونەردى تۋلاقشا تارتىپ، اركىم وزىنشە ايتىپ ۇيىمداستىرىپ الەك. الايدا، ايتىستاعى بۇل الاۋىزدىق ءتول ونەردىڭ دامۋىنا تۇساۋ بولماسا يگى.
