ءۇي ساتىپ الاردا نەنى ەسكەرگەن ءجون؟

 استانا. قازاقپارات - قوناق بولمەنىڭ ءتۇسقاعازى قانداي بولاتىنىن جوسپارلاماس بۇرىن، ءبىرىنشى جىلجىمايتىن مۇلىكتى شامامەن قانداي باعادا ساتىپ الۋعا دايىن ەكەنىڭىزدى انىقتاپ الىڭىز.

 ساراپشىلاردىڭ ايتۋىنشا پاتەردىڭ ورنالاسقان جەرى مەن كولەمى ەڭ الدىمەن وسى سۇراققا تاۋەلدى. سودان كەيىن عانا Baq.kz ءتىلشىسى دايىنداعان تومەندەگى كەڭەستەرگە قۇلاق ءتۇرىپ، وزىڭىزگە جايلى پاتەر تاڭداۋعا كىرىسسەڭىز بولادى.

ءسىز تۇراتىن ءۇيدىڭ جانىندا نە بولۋى كەرەك؟

ءسىز ءجيى باراتىن ورىندار، مىسالى دۇكەندەر، قوعامدىق كولىك ايالداماسى، بالاباقشا، مەكتەپ، اۋرۋحانا جاياۋ 15 مينۋتتا جەتەتىن جەردە ورنالاسۋى كەرەك. اقشاڭىزدى ۇنەمدەيمىن دەپ قالا شەتىنەن پاتەر ىزدەسەڭىز جۇمىسىڭىز بەن وقۋ ورنى، نەمەسە باسقا دا ورىندارعا كۇندەلىكتى بارىپ كەلۋگە قانشا ۋاقىت كەتەتىنىن ەسەپتەپ كورىڭىز.

قازىر ءاربىر ۇيدە ءبىر اۆتوكولىك، سول سەبەپتى كولىك تۇراعى ماسەلەسىن دە شەشىپ العان دۇرىس.

جاڭا تۇرعىن ءۇي مەن قولدانىستاعى تۇرعىن ءۇيدىڭ قايسىسىن تاڭداعان دۇرىس؟

ارينە، جاڭانىڭ ءبارى ءارقاشان جانعا جايلى. بۇل دەگەنىمىز تازا پودەزد، ۇزدىكسىز جۇمىس ىستەيتىن ليفت.. . مامانداردىڭ ءوزى دە العان سوڭ بىردەن پاتەردىڭ جاڭاسىن ساتىپ الۋ كەرەگىن قۇپتايدى. مۇنداي جاعدايدا ءسىز وسى زامانعا ساي سالىنعان، بارلىق كوممۋنيكاتسيامەن قامتىلعان تازا پاتەرگە قول جەتكىزەسىز. بۇدان بولەك جاڭا تۇرعىن ءۇي كەشەندەرى ماڭايىندا ينفراقۇرىلىمدى نىسانداردىڭ بارلىعى بولاتىنى انىق. ساراپاشىلاردىڭ ءبىر بولىگى جاڭا پاتەردى ساتىپ العاندا جوندەۋ جۇمىستارىنا قوسىمشا قارجىنىڭ كوپتەپ كەتەتىنىن، سونداي- اق قابىرعانى تەسىپ، قۇرىلعىلار ورناتىپ جاتقان كورشىلەرگە دە توزىممەن قاراۋ كەرەگىن ەسكەرتەدى.

ال قولدانىستاعى ۇيلەردەن پاتەر الۋشىلار جىلجىمايتىن مۇلىك پەن قۇجاتتارعا قىسقا مەرزىمدە قول جەتكىزەدى. ال جاڭا پاتەر ىزدەگەندەر قۇرىلىستىڭ اياقتالماي، ۇزاق ۋاقىتقا سوزىلۋى، قۇرىلىستى سالۋشىنىڭ بانكروت بولۋى سەكىلدى قاۋىپ- قاتەرلەرگە تاپ بولۋى مۇمكىن.

پاتەر قارايتىن كەزدە اڭعارىمپاز بولىڭىز

پاتەردى قاراپ شىعۋ ۇزاق ۋاقىتتى الادى. ساراپشىلار بىرنەشە پاتەردى بىردەن قاراماۋ كەرەگىن ەسكەرتەدى. سونداي- اق پاتەرلەردى كۇندىزگى ۋاقىتتا ارالاپ شىعىڭىز، سەبەبى جارىقتىڭ قالاي تۇسەتىنىن بىلە الاسىز. كورگەنىڭىزدى فوتواپپارات نەمەسە سمارتفونىڭىزعا فوتوعا ءتۇسىرىپ ءجۇرۋدى ۇمىتپاڭىز. كەيىن اسىقپاي سۋرەتتەردى تاماشالاعاندا كەمشىلىكتەرى مەن ايىرماشىلىقتارىن بايقاي الاسىز.

پاتەردى قاي قاباتتان العان دۇرىس؟

 ءبىرىنشى قاباتتىڭ كەمشىلىكتەرى: سىز، سۋىق (اسىرەسە جىلۋدى وشىرگەندە) ، ءيىس، كوشەدەگى دىبىستار، ۇرىلاردان قورعانۋ كەرەك، ءۇي تەرەزەسىنەن كوشەدەگى ادامدار دا، پاتەر يەلەرى دە كورىنىپ تۇرادى.

ءبىرىنشى قاباتتىڭ ارتىقشىلىقتارى: كوشكەندە ەشقانداي قيىندىقتار جوق، ليفت كومەگىنە جۇگىنبەيسىز.

سوڭعى قاباتتىڭ كەمشىلىكتەرى: ەگەر ءۇي ناشار سالىنسا نەمەسە كومۋنالدىق قىزمەت ناشار جۇمىس ىستەسە شاتىردان سۋ اعۋ، ال ليفت بۇزىلعاندا جاياۋ جوعارى كوتەرىلۋ، جوعارىعا كەلەتىن سۋ كۇشىنىڭ السىزدىگى نەمەسە تەك سۋىق سۋدىڭ كەلۋى.

سوڭعى قاباتتىڭ ارتىقشىلىقتارى: ايقاي- شۋى ەستىلەتىن توبەڭىزدە كورشىلەرىڭىز جوق جانە تەرەزەدەن اينالا ادەمى كورىنەدى.

جوعارى قاباتتاعى پاتەردى كورگەندە شاتىردىڭ سوڭعى رەت قاشان جوندەلگەنىن ءبىلىپ الىڭىز. پاتەر قابىرعاسىنا زەر سالىڭىز، ەگەر شاتىردان ءجيى سۋ اقسا وندا قابىرعا ىلعال بولادى نەمەسە سۋدىڭ ءىزى قالىپ قويادى.

ەڭ ۇتىمدى شەشىم - 3 پەن 5 قابات ارالىعى.

بولمە سانى، جارىقتىڭ ءتۇسۋى جانە ت. ب.

قانشا بولمەنى قالايتىنى ادامنىڭ وزىنە عانا ايان. بىرەۋگە كولەمى كىشكەنتاي بولسا دا 3 بولمە، ال بىرەۋگە كولەمى كەڭ ەكى بولمە ۇناۋى مۇمكىن. ءار ادامنىڭ ءجيى جالعىز قالۋدى قالايتىنىن ەسكەرىڭىز، ال كوپ ادام تۇراتىن ۇيدە ورىن بولماۋى مۇمكىن.

ەكى بولمەلى پاتەر بولسا ارالارى ءبولىنىپ تۇرۋى ءتيىس. ال ءبىر بولمەلى پاتەر جارىق بولۋى كەرەك.

جارىقتىڭ ءتۇسۋى تەرەزەنىڭ قاي تۇسقا قاراپ سالىنعانىنا بايلانىستى، مىسالى وسىمدىكتەرىڭىز بەن اكۆاريۋمىڭىز بولسا جىلى جاق، ياعني تەرەزەلەر وڭتۇستىككە قاراي ورنالاسۋى ءتيىس. مۇندايدا جەرگىلىكتى كليمات ىستىق بولسا جازدا جەلدەتكىشسىز ءومىر ءسۇرۋ قيىن، بۇل دا قوسىمشا شىعىن. ال بولمەڭىزدىڭ جارتىلاي قاراڭعى بولۋىن قالاساڭىز سولتۇستىكتى تاڭداڭىز، دەگەنمەن پاتەردىڭ ۇنەمى قاراڭعى بولۋىنان ەلەكتر جارىعىنا قوسىمشا شىعىن كەتەدى.

دارەتحانا پەن جۋىناتىن بولمەنىڭ بولەك بولعانى دۇرىس. سەبەبى دارەتحانادا بىرەۋدىڭ بارىن، نە جۋىنىپ جاتقانىن كۇتىپ تۇرمايسىز.

پاتەردىڭ ينفراقۇرىلىمىن باعالاڭىز

تەحنيكالىق ينفراقۇرىلىم - جوندەۋ جۇمىستارىنىڭ ەڭ قىمبات بولىگى. مۇنى تەحپاسپورت ارقىلى زەرتتەۋگە بولادى: ءۇي توبەسىنىڭ بيىكتىگىن، ەلەكتر سىمدار جۇيەسى، سانتەحنيكا مەن جىلىتۋ قالاي جۇرگىزىلگەنىن انىقتاپ قاراڭىز. سونداي- اق، جەلدەتۋ مەن شۋدان وقشالاۋ جۇيەسىن ءبىر تەكسەرىپ شىعۋدى ۇمىتپاڭىز.

پاتەر بۇرىشتارى مەن تەرەزە جانىن تەكسەرىڭىز. ءۇي ىلعال بولسا ادەتتە قابىرعا كوگەرىپ تۇرادى. پاتەردىڭ بۇرىن جالعا بەرىلگەنىن بىلسەڭىز وندا سىزگە ساتىپ العاننان كەيىن قۇلپىن اۋىستىرۋعا تۋرا كەلەدى.

 سۋ مەن ەلەكتر ەسەپتەۋىشىنىڭ بار- جوعىن انىقتاڭىز، ەگەر جوق بولسا وندا ءوزىڭىز ورناتۋىڭىز قاجەت. ەسەپتەۋىش بولعان جاعدايدا تەكسەرىلگەن كۇنىن قاراپ الىڭىز. ەسكى ۇيلەردىڭ بالكونىنا شىعۋ قاۋىپتى ەكەنىن ەسكەرسەك ونى دا كوزبەن شولىپ شىعىڭىز.

بولاشاق كورشىلەرىڭىزدىڭ كىمدەر ەكەنىن انىقتاڭىز

پودەزد الدىندا بوتەلكە، شپريس سەكىلدى زاتتاردىڭ جاتۋى سول ءۇيدىڭ تۇرعىندارى تۋرالى كوپ اقپار بەرەدى. مۇنداي زاتتاردىڭ جوقتىعى تۇرعىن ءۇيدىڭ قاۋىپسىزدىگىنە كەپىل بولا المايدى. ەگەر كورشى پودەزدە ىشىمدىككە سالىنعان ادامدار، قاڭعىباستار ءومىر سۇرەتىن بولسا تاعى دا ويلانۋىڭىز كەرەك. پاتەردى ساتىپ الماس بۇرىن جوعارى جانە تومەنگى قاباتتا، جانىڭىزدا كىمدەر تۇراتىنىن انىقتاپ الىڭىز. ال جاڭا پاتەر قاراستىرىپ جۇرگەندە كورشىلەردىڭ كىم ەكەنىن باعامداي المايسىز.

الاياقتارعا الدانىپ قالماس ءۇشىن بىردەن كەلىسسوزدەر جۇرگىزۋگە تىرىسپاڭىز. پاتەرلەردى ءارتۇرلى اگەنتتىكتەردەن قاراڭىز. ءۇيدىڭ باعاسىن ءتۇسىرۋ ءۇشىن پاتەر كەمشىلىكتەرى مەن پروبلەمالىق تۇستارىن كوپتەپ تاۋىپ الىڭىز. مىسالى، قاۋىپتى ءارى ەسكى بالكون، ءۇيدىڭ قاۋىپتى اۋداندا ورنالاسۋى، قابىرعانىڭ كوگەرۋى، ءبىرىنشى قاباتتاعى پاتەر جانە ت. ب.

 

نازەركە ابيبۋللا