عالىمدار ەرلەردىڭ ءيىسى ايەلدەرگە قالاي اسەر ەتەتىنىن انىقتادى

 استانا. قازاقپارات - كاناداداعى بريتانيالىق كولۋمبيا ۋنيۆەرسيتەتىنىڭ پسيحولوگتارى ەر ادامنىڭ ءيىسى سەرىگىنىڭ كۇيزەلىسىن تومەندەتەتىنىن انىقتادى.

 ولاردىڭ ماتەريالىن MedXpress جۋرنالى جاريالادى، دەپ حابارلايدى ria.ru باسىلىمى.

زەرتتەۋگە 96 جۇپ قاتىستى. ەرلەرگە تازا جەيدە بەرىلدى. ولار ونى ءبىر تاۋلىك بويى كيىپ ءجۇرۋى ءتيىس بولدى. سونىمەن قاتار، دەزودورانت پەن حوش ءيىسى بار حيميانى جاعۋعا، تەمەكى تارتۋعا تىيىم سالىندى. 24 ساعاتتان كەيىن جەيدەلەر ءوز ءيىسىن ساقتاپ تۇرۋ ءۇشىن قاتىرىلىپ تاستالدى.

كەيىن ايەلدەرگە ساراپتاماعا قاتىسۋشى باسقا ەرلەردىڭ (ءوز سۇيىكتىلەرىنىڭ ەمەس) كيگەن جەيدەلەرىن يىسكەتتى.

وسىدان كەيىن نازىك جاندىلار كۇيزەلىس تەستىن تاپسىردى. وندا ماتەماتيكالىق تاپسىرمالار بولدى جانە ولار وزدەرىنىڭ كوڭىل- كۇيىنە قاتىستى سۇراقتارعا جاۋاپ بەردى. ورگانيزمدەگى كورتيزول (كۇيزەلىس گارمونى) دەڭگەيىن ولشەۋ ءۇشىن ايەلدەردىڭ سىلەكەيىنە تالداۋ جاسالدى.

ساراپتاما دەرەكتەرىنە سايكەس، عالىمدار ءوز سىڭارلارىنىڭ جەيدەسىن يىسكەگەن ايەلدەردىڭ كوڭىلى ورنىندا بولعانىن انىقتادى. ولاردا كورتيزولدىڭ ەڭ تومەن دەڭگەيى تىركەلگەن. ال، وزگەنىڭ جەيدەسىن يىسكەگەندەر كۇيزەلىسكە ءتۇسىپتى. ماماندار مۇنداي زاڭدىلىقتارعا ەۆوليۋتسيالىق فاكتورلار اسەر ەتەدى دەپ وتىر.

«كىشكەنتاي كەزىنەن باستاپ ادامدار بەيتانىس ادامنان، اسىرەسە ەر ادامنان سەسكەنەدى، تارتىنادى. سوندىقتان بوتەن ادامداردىڭ ءيىسى ورگانيزمدە «ۇر نەمەسە قاش» دەگەن رەاكسيا تۋعىزۋى ىقتيمال. ال، ول كورتيزول دەڭگەيىن كوتەرەدى. بۇل سانالى تۇردە بولماۋى مۇمكىن» ، - دەدى زەرتتەۋ اۆتورلارىنىڭ ءبىرى مارليز حوفەر.