ەلباسىنىڭ «تاۋەلسىزدىك ءداۋىرى» كىتابىنىڭ ەلەكتروندىق نۇسقاسى جاريالاندى
«قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ «تاۋەلسىزدىك ءداۋىرى» اتتى بۇل كىتابى تاريحي پۋبليتسيستيكا جانرىندا جازىلعان، ول ەلىمىزدىڭ جاڭا تاريحى مەن ونىڭ ەرتەڭىنە دەگەن اۆتوردىڭ كوزقاراسىن تانىتادى. ەگەمەن مەملەكەتتىڭ نەگىزى قالانعان كۇننەن باستاپ ونىڭ قالىپتاسۋ كەزەڭدەرىنىڭ ەرەكشەلىكتەرى مەن 26 جىلدىق تاۋەلسىزدىك داۋىرىندەگى ىشكى جانە سىرتقى سىن- قاتەرلەردى ەڭسەرۋگە بايلانىستى قابىلدانعان شەشىمدەردىڭ ءمان- مازمۇنى مەن تەتىكتەرى ەگجەي- تەگجەيلى باياندالادى» دەلىنگەن حابارلامادا.
سونداي- اق، جاريالانعان ماتىندە پرەزيدەنتتىڭ كىتابىندا «قازاقستاندىق دامۋ ۇلگىسىنىڭ» تابيعاتى مەن ونىڭ ەۆوليۋتسياسى، باستى ۇستانىمدارى جازىلعانى تۋرالى دەرەك كەلتىرىلگەن.
«كىتاپتا «قازاقستاندىق دامۋ ۇلگىسىنىڭ» تابيعاتى مەن ونىڭ ەۆوليۋتسياسى، باستى ۇستانىمدارى مەن قوزعاۋشى كۇشتەرى سارالانعان. قازاقستاندى جاڭعىرتۋدىڭ ءۇش تولقىنى كەڭىنەن اشىپ كورسەتىلگەن. ءبىرىنشى جانە ەكىنشى جاڭعىرتۋ اياسىندا توتاليتارلىق جۇيەدەن تۇبەگەيلى اجىراپ، نارىقتىق ەكونوميكانى قۇرۋ جانە باسەكەگە بارىنشا قابىلەتتى ەلۋ ەلدىڭ قاتارىنا قوسىلۋ مىندەتى مەرزىمىنەن بۇرىن ورىندالدى. ءۇشىنشى جاڭعىرتۋدىڭ ماقساتى - ەلىمىزدى قالىپتاسقان جاڭا جاھاندىق احۋال جاعدايىندا جاڭعىرتا وتىرىپ، الەمدەگى ەڭ وركەندى 30 مەملەكەتتىڭ قاتارىنا قوسۋ» دەپ جازىلعان.
