وليمپيادادا وڭتايلى كۇيگە كەلەمىن - دەنيس تەن

استانا. قازاقپارات - سوچي وليمپياداسىنىڭ قولا جۇلدەگەرى دەنيس تەن وتكەن جىلدىڭ تامىز ايىندا جاراقات العان اياعىنىڭ قالاي جازىلىپ كەلە جاتقانىن ايتتى، دەپ حابارلايدى قازاقپارات.

ونىڭ ايتۋىنشا، توبىعىن قالپىنا كەلتىرۋدەگى وڭالتۋ ەم-دومى 150 كۇنگە سوزىلعان. قازىرگى ۋاقىتتا مانەرلەپ سىرعاناۋشى فيزيوتەرەپيا الىپ، بۋىندارىن كۇشەيتۋگە ارنالعان جاتتىعۋلاردى جاساۋدا. سونىمەن قاتار توقسان سايىن ەكپە سالدىرىپ، زالدا كوپ جۇمىس ىستەۋدە.

«اياعىمدى رەكۋپەراتسيالاۋ بويىنشا 2018-جىلعى ءبىرىنشى (سوڭعى دەپ ءۇمىت ارتامىن) تەكسەرۋى. بۇگىن ماگنيتتىك- رەزونانستىق توموگرافيا بۋىنداردىڭ ءبىر-بىرىمەن بايلانىسا باستاعاندىعىن كورسەتتى، سونىمەن بىرگە سۇيەكتىڭ قانتالاۋى ازايدى. ەگەر ءبىرىنشىسى اياقتى تۇراقسىزداندىرسا، ەكىنشىسى كەنەتتەن اۋىرتىپ جىبەرەتىن. تولىقتاي قالىپقا كەلۋ ءۇشىن ءالى دە شامامەن 6 اي قاجەت. دەگەنمەن، وليمپياداعا قاراي وڭتايلى كۇيگە كەلەمىن»، - دەپ جازدى سپورتشى ينستاگرامداعى پاراقشاسىندا.

دەنيس تەن بۇعان دەيىن جاتتىعۋلار بارىسىندا سەكىرگەننەن كەيىن وڭ اياعىمەن عانا جەرگە تابان تىرەي العاندىعىن، ال قازىر قارعي الاتىن بولعانىن اتاپ وتكەن.

«بۇل ءالى دە بولسا اۋىرتىپ جىبەرەدى. ءبىراق، ەندى جۇكتەمەنى ارتتىرۋعا دا بولادى. ارينە، مۇنداي جەتىستىك قۋانتارلىق ەمەس. دەگەنمەن، 3 اپتا بۇرىن العاش رەت جاتتىعۋ بارىسىندا لۋتتس (وڭ اياقپەن ورىندالادى) سەكىردىم، فليپتى ودان ءسال ەرتەرەك جاساي باستادىم. قارقىندى كەزەڭ تۋىپ كەلەدى»، - دەدى مانەرلەپ سىرعاناۋشى.

ايتا كەتەيىك، 2018-جىلدىڭ 9-25 اقپانى ارالىعىندا وڭتۇستىك كورەيانىڭ پحەنچحان قالاسىندا قىسقى وليمپيادا ويىندارى وتەدى. الەمنىڭ 80 ەلىنەن 5 مىڭنان استام سپورتشى مەن رەسمي وكىل قاتىساتىن اق وليمپيادادا سپورتتىڭ 15 تۇرىنەن 102 مەدال جيىنتىعى ساراپقا سالىنباق. ال قازاقستان سپورتشىلارى بياتلون، مانەرلەپ سىرعاناۋ، تاۋ شاڭعىسى جارىسى، شورت-ترەك، كونكيمەن سىرعاناۋ، شانا سپورتى، شاڭعى تەبۋ، ترامپليننەن شاڭعىمەن سەكىرۋ، فريستايل (اكروباتيكا، موگۋل) سىندى سپورتتىڭ 9 تۇرىنەن ەل نامىسىن قورعايتىن بولادى. بۇگىنگە دەيىن ەل قورجىنىندا 30 جولداما بار.

اۆتور: مارلان جيەمباي