قازاق بالاسى وڭتۇستىك كورەيادا تەلەجۇرگىزۋشى بولىپ ءجۇر
كۋكمين ۋنيۆەرسيتەتىنىڭ ءۇشىنشى كۋرسىندا وقيتىن ول، وڭتۇستىك كورەيا تەلەارنالارىنا تانىمال بولىپ ۇلگىردى، - دەپ جازدى 24.kz.
قازاقستاندىق داستان ۆاليۋليننىڭ ءومىرى ۋنيۆەرسيتەت، ستۋديا، حوككەي الاڭى اراسىندا ءوتىپ ءجۇر. ول وڭتۇستىك كورەياعا ءبىلىم الۋ ءۇشىن ءتورت جىل بۇرىن كەلگەن.
كورەي ءتىلىن ۇيرەنگەنى سونشالىق ونى جەرگىلىكتى تەلەارنالار شاقىرا باستاعان. تەلەباعدارلامالاردىڭ بىرىندە ول وڭتۇستىك كورەيالىق حالىققا ءوز وتانى تۋرالى ايتىپ بەرىپ، باۋىرساق ءپىسىرۋ مەن ەتتى قالاي اساتىنىن ۇيرەتتى.
جاقىندا داستان پحەنچحاندا وتەتىن وليمپيادالىق جانە پاراليمپيالىق ويىندارعا قازاقستان ەلشىسى رەتىندە قاتىسادى.
ونىڭ مىندەتى - وليمپيادا قوناقتارىنا كورەي تىلىندە كورەيا تۋرالى ايتىپ بەرۋ جانە قازاقستاندىقتارعا كورەيا مادەنيەتى تۋرالى قازاق، ورىس تىلدەرىندە اقپارات بەرۋ.
«مەن قازاقستاندا عارىش الاڭى بار ەكەنىن جانە ونىڭ اشىق عارىشقا ۇشۋ ءۇشىن ءتيىمدى ءارى قولايلى جەر ەكەندىگى تۋرالى العاش رەت داستاننان ەستىدىم. مۇنداي دەرەكتەردى كورەيلىكتەر بىلمەيدى. قازاقستاننىڭ تۇرمىسى مەن سالت- ءداستۇرى جونىندە ءبىز تەلەارنادا ءبىرقاتار باعدارلامالار دايىنداپ ءجۇرمىز. ەلىنىڭ بەدەلىن ايقىنداپ بەرۋدە داستانعا ۇلكەن جاۋاپكەرشىلىك ارتىپ وتىرمىز» ، - دەدى تەلەپروديۋسەر لي سىن تحەك.
«مەن ءوزىمدى كورەيادا اكتەر رەتىندە، جۇرگىزۋشى رەتىندە سىناپ كورگىم كەلەدى. جەرگىلىكتى حالىققا قازاقستان تۋرالى ايتقىم كەلەدى. سونىمەن قاتار، ارمانىمداعى جۇمىسىمدى تاۋىپ، قازاقستان مەن كورەيانى ءوزارا بايلانىستىراتىن ءوزىمنىڭ كاسىبىمدى اشقىم كەلەدى» ، - دەيدى پحەنچحاندا وتەتىن وليمپياداداعى قازاقستان ەلشىسى داستان ۆاليۋلين.
قازاقستانعا كەلۋ باقىتى بۇيىرعان وڭتۇستىك كورەيالىقتار ءبىزدىڭ ەلدى «سۇلۋ ادامدار ەلى» دەپ اتايدى ەكەن.
سۇلۋ قازاق قىزىنىڭ بەت- بەينەسىن ۆولەيبولشى سابينا التىنبەكوۆا قالىپتاستىرسا، ادەمى جىگىتتىڭ بەينەسىن ستۋدەنت داستان ۆاليۋلين قالىپتاستىرىپ كەلەدى.
