نۇرسۇلتان نازاربايەۆ ب ۇ ۇ قاۋىپسىزدىك كەڭەسىندە ءسوز سويلەيدى
بۇل تۋرالى سەيسەنبىدە نيۋ-يوركتەگى ب ۇ ۇ شتاب-پاتەرىندە بولعان باسپا ءسوز ءماسليحاتىندا قازاقستاننىڭ ب ۇ ۇ جانىنداعى تۇراقتى وكىلى، قاۋىپسىزدىك كەڭەسىنىڭ قاڭتارداعى ءتوراعاسى قايرات وماروۆ مالىمدەدى، دەپ حابارلايدى قازاقپارات ب ۇ ۇ جاڭالىقتار ورتالىعىنا سىلتەمە جاساپ.
ەلشى قاۋىپسىزدىك كەڭەسىنىڭ وسى ايداعى جۇمىسى جايىندا اڭگىمەلەدى، سونداي-اق 18- قاڭتاردا كەڭەستە جاپپاي قىرىپ-جويۋ قارۋلارىن تاراتپاۋعا ارنالعان جوعارى دەڭگەيدەگى تاقىرىپتىق بريفينگ وتەتىندىگىن ايتتى. وعان ءبىرقاتار ەلدەردىڭ باسشىلارى مەن مينيسترلەرى قاتىسادى. بريفينگتە قازاقستان پرەزيدەنتى نۇرسۇلتان نازاربايەۆ ءسوز سويلەيدى.
«نەلىكتەن بۇل ماسەلەنى قوزعاۋعا شەشىم قابىلدادىق؟ ءبىز بۇگىنگى تاڭدا ءتۇرلى ساياسي كوشباسشىلاردىڭ، ەلدەردىڭ اراسىندا سەنىمدى قارىم-قاتىناستار قۇرۋعا كوبىرەك ءمان بەرۋىمىز قاجەت دەپ ەسەپتەيمىز»، - دەدى قايرات وماروۆ. - ونسىز ەشقانداي ماسەلەنى شەشۋ مۇمكىن ەمەس. مەنىڭشە، قازىرگى الەمدە ءدال وسى جەتپەي تۇر».
ق. وماروۆ 19- قاڭتار كۇنى قاۋىپسىزدىك كەڭەسىندە قازاقستاننىڭ سىرتقى ىستەر ءمينيسترى قايرات ءابدىراحمانوۆ اۋعانستان مەن ورتالىق ازيا ەلدەرى اراسىنداعى وڭىرلىك ىنتىماقتاستىقتى نىعايتۋعا ارنالعان مينيسترلەر دەڭگەيىندەگى پىكىرسايىسقا ءتوراعالىق ەتەتىندىگىن ءمالىم ەتتى. وتىرىستا ب ۇ ۇ باس حاتشىسى انتونيۋ گۋتەرريش ءسوز سويلەيدى. ب ۇ ۇ باسشىسى ورتالىق ازياعا وتكەن جىلدىڭ جازىندا كەلگەن.
قازاقستان ەلشىسىنىڭ سوزىنە قاراعاندا، قاۋىپسىزدىك كەڭەسىنىڭ قاڭتارداعى كۇن تارتىبىندە تۇرعان ءۇشىنشى ماڭىزدى تاقىرىپ تاياۋ شىعىس، سونىڭ ىشىندە پالەستينا ماسەلەسى بولماق. سونداي-اق قاۋىپسىزدىك كەڭەسىنىڭ مۇشەلەرى سيرياداعى جاعدايدى دا تالقىلايدى، - دەدى ق. وماروۆ.
ول 2017-جىلى جەلتوقساندا استانادا سيريا بويىنشا كەزەكتى كەزدەسۋ وتكەندىگىن ەسكە سالدى. ب ۇ ۇ- دا ونى ناتيجەلى دەپ باعالادى.
قازاقستان العاش رەت قاۋىپسىزدىك كەڭەسىنىڭ مۇشەسى بولدى جانە العاش رەت وعان ءتوراعالىق ەتۋدە. قازاقستان ورتالىق ازيا ەلدەرىنىڭ ىشىندە قاۋىپسىزدىك كەڭەسىنىڭ تۇراقتى ەمەس مۇشەلىگىنە سايلانعان العاشقى مەملەكەت اتاندى.
قازاقستان پرەزيدەنتى نۇرسۇلتان نازاربايەۆ 2015-جىلى ب ۇ ۇ مىنبەرىنەن ءسوز سويلەۋدە.
