قازاقستاندىق بوكسشى قىتايدان كەلگەن قازاقتان باسىم ءتۇستى
ايقاستىڭ العاشقى جارتىسى قارسىلاستاردىڭ ءبىرىن- ءبىرى بارلاۋىمەن ءوتتى. ءۇشىنشى راۋندتا بىرلىك وكپە تۇسىنان اۋىر سوققى وتكىزىپ الىپ، نوكداۋنعا ءتۇسىپ قالعانىمەن، ەسىن جيىپ الدى. نوكداۋننان كەيىن رايىمقۇلوۆ قارسىلاسىن قىرىنا الىپ، مەرزىمىنەن بۇرىن كەزدەسۋدى اياقتاۋعا بارىن سالعان ەدى. الايدا بىرلىك گونگ سوعىلعانشا شىداپ باقتى. ءتورتىنشى ءارى سوڭعى راۋندتا رايىمقۇلوۆتىڭ باسىمدىعى انىق كورىندى.
«مەن ۇزدىك جاتتىعۋدىڭ ارقاسىندا جەڭىسكە جەتتىم. وسىلايشا، ۇلكەن ارەناداعى شايقاستارعا شىعىپ، سوندەرس پەن الۆارەستىڭ دەڭگەيىندەگى بوكسشىلارمەن شىققىم كەلەدى. مەنىڭ ەسىمىمدى ەستەرىڭىزگە ساقتاپ الىڭىزدار! مەنىڭ اتىم - قارا باتىر. قارسىلاسىم دا مىقتى ەدى، الايدا بۇگىن مەن جەڭىس تۇعىرىنان كورىندىم. قازاقتىڭ بوكس مەكتەبىنىڭ الەمدە تەڭدەسى جوق»، - دەيدى رايىمقۇلوۆ ايقاستان كەيىن.
ايتا كەتەرلىگى، بۇل تەمىرلان رايىمقۇلوۆتىڭ ءۇشىنشى ايقاسى. ونىڭ ەكەۋىندە تەمىرلان جەڭىسكە جەتىپ، تاعى بىرەۋىندە قارسىلاسىمەن تەڭ تۇسكەن. ال قانداسىمىز بىرلىك تە ءۇشىنشى رەت شارشى الاڭعا شىعىپ، ەكى بوكسشىدان باسىم تۇسكەن.
ايان بەكەن ۇلى
