18:16, 30 - جەلتوقسان 2017 | GMT +5
قازاقتىڭ ءۇش بيىنە تاعى ءبىر ەسكەرتكىش قويىلدى
استانا. قازاقپارات - اقتوبە وبلىسى مۇعالجار اۋداندىق سوتىنىڭ الدىندا ورنالاسقان ورتالىق ساياباقتا قازاقتىڭ اتاقتى ءۇش ءبيى - تولە، قازىبەك پەن ايتەكە بيلەرگە ارنالعان ەسكەرتكىش ورناتىلدى، دەپ حابارلايدى قازاقپارات ءتىلشىسى اقتوبە وبلىستىق سوتىنا سىلتەمە جاساپ.
ەسكەرتكىشتى مۇعالجار اۋداندىق سوتى ءتوراعاسىنىڭ مىندەتىن اتقارۋشى ج. م. سەيتجاپاروۆ پەن «ارداگەرلەر ۇيىمى» قوعامدىق بىرلەستىگىنىڭ وكىلدەرى سالتاناتتى تۇردە اشتى.
«شارا بارىسىندا مۇعالجار اۋداندىق سوت ءتوراعاسىنىڭ مىندەتىن اتقارۋشى ج. م. سەيتجاپاروۆ جيىنعا قاتىسۋشىلاردى «ءۇش ءبي» ەسكەرتكىشىنىڭ اشىلۋ سالتاناتىمەن قۇتتىقتاپ، XVII عاسىردىڭ ەكىنشى جارتىسى مەن XVIII عاسىردىڭ ءبىرىنشى جارتىسىندا ۇلى دالا مەدياتورى اتانىپ، اڭىزعا اينالعان اتاقتى ءۇش بي - تولە، قازىبەك، ايتەكە بيلەر تۋرالى ءسوز قوزعادى»، - دەلىنگەن رەسمي حابارلامادا.
