جاڭا كەدەندىك زاڭ قازاقستانعا ويىنشىق جەتكىزۋ ەرەجەسىن كۇشەيتتى
«بىرىنشىدەن، شارتتى تۇردە شىعارۋعا تىيىم سالۋعا قاتىستى تاۋارلار ءتىزىمىن انىقتاۋعا ۇكىمەتتىڭ قۇزىرەتى بەكىتىلدى. ماسەلەن، بالالار ويىنشىعى سىندى بەلگىلى ءبىر تاۋار تۇرلەرىنىڭ ءقاۋىپسىز ەكەنى، تەحنيكالىق رەگلامەنتتەرگە سايكەستىگى راستالعان جاعدايدا عانا ەركىن اينالىمعا جىبەرىلەدى»، - دەدى ق ر ۇلتتىق ەكونوميكا ۆيتسە-ءمينيسترى باۋىرجان بەكەشەۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
ۆيتسە-ءمينيستردىڭ ايتۋىنشا، شارتتى تۇردە شىعارۋعا تىيىم سالىنعان تاۋارلار ءتىزىمىن قۇزىرلى ورگاندار ءالى دە تالقىلاپ جاتىر.
«بۇل ءتىزىم ءالى دە جەتىلدىرىلەدى جانە قازىر مەملەكەتتىك ورگانداردىڭ كەلىسىمىندە جاتىر. وندا بالالار ويىنشىعى، گيگيەنا زاتتارى سىندى وزگە دە تاۋارلار ەنەدى. بۇل ەڭ الدىمەن بالالارعا جانە ادام تانىنە قاتىستى. ءتىزىم بەكىتىلگەن سوڭ، رەسمي تۇردە جاريالايمىز»، - دەدى بەكەشەۆ.
ەسكە سالا كەتسەك، جەلتوقسان ايىندا مەملەكەت باسشىسى نۇرسۇلتان نازاربايەۆ كەدەندىك رەتتەۋ ماسەلەلەرى بويىنشا ءۇش زاڭ جوباسىنا قول قويدى. اتاپ ايتقاندا، «ەۋرازيالىق ەكونوميكالىق وداقتىڭ كەدەن كودەكسى تۋرالى شارتتى راتيفيكاتسيالاۋ تۋرالى» زاڭ، جاڭا كەدەندىك كودەكس جانە وعان ىلەسپە زاڭ.
