قازاقستانداعى العاشقى كاسىبي پارلامەنت قالاي سايلاندى - ەلباسى كىتابىنان
تاريحي پۋبليتسيستيكا جانرىندا جازىلعان، قازاق جانە ورىس تىلدەرىندە باسىلعان ەلباسىنىڭ بۇل ەڭبەگى ەلىمىزدىڭ جاڭا تاريحى مەن ونىڭ ەرتەڭىنە دەگەن اۆتوردىڭ كوزقاراسىن تانىتادى. بۇگىن «قازاقپارات» وسى كىتاپتان قازاقستاندا تۇڭعىش رەت سەنات پەن ءماجىلىس دەپۋتاتتارىن سايلاۋ، العاشقى كاسىبي پارلامەنت جونىندەگى ەلباسىنىڭ ەستەلىكتەرىنەن ءۇزىندى كەلتىرۋدى ءجون كورىپ وتىر.
***
1995 -جىلعى پارلامەنت سايلاۋى. العاشقى كاسىبي پارلامەنت.
كونستيتۋتسيا قازاقستاندىق پارلامەنتاريزمدى دامىتۋدىڭ پرينسيپتى تۇردەگى جاڭا كەزەڭىن باستاپ بەردى. بۇرىن «پارلامەنت» ءسوزى جوعارعى كەڭەسكە قاتىستى ايتىلسا دا، رەسمي قولدانىلعان ەمەس. جاڭا نەگىزگى زاڭ پارلامەنتتى جوعارى زاڭ شىعارۋشى ورگان دەپ جاريالاپ، بۇل سوزگە مەملەكەتتىك مارتەبە بەردى، ال ۇعىمنىڭ ءوزىن ناقتى ساياسي مازمۇنمەن بايىتتى.
1995 -جىلدىڭ 5 -جەلتوقسانىندا العاشقى سەنات سايلاۋى، 9 -جەلتوقساندا - قازاقستان حالىق بىرلىگى پارتياسى 67 ورىننىڭ 24-ىنە يە بولىپ، سەنىمدى تۇردە جەڭىسكە جەتكەن ءماجىلىس سايلاۋى وتكىزىلدى. دەموكراتيالىق پارتيا - 12 ورىن، شارۋالار وداعى - 7، كاسىپوداق فەدەراتسياسى - 5، جاستار وداعى - 3، ينجەنەرلىك اكادەميا - 5، كومپارتيا 2 ورىن الدى. قازاقستان حالىق كونگرەسىنە، حالىقتىق-كووپەراتيۆتىك پارتياعا، كاسىپكەرلەر وداعىنا، قازاقستاننىڭ قايتا قۇرۋ پارتياسى مەن «نەۆادا - سەمەي» قوعامدىق قوزعالىسىنا ءبىر-ءبىر ورىننان ءتيدى.
مەنىڭ ۇسىنىسىم بويىنشا سەنات ءتوراعالىعىنا ءو. بايگەلدى سايلاندى، ءماجىلىستى م. وسپانوۆ باسقاردى. مەن، ول كەزدە قوسىمشا زاڭدى وكىلەتتىككە يە پرەزيدەنت رەتىندە پارلامەنتكە زاڭ بويىنشا وزىمە تيەسىلى بارلىق زاڭدىق بيلىكتى بەردىم. سول ارقىلى ماعان بەرىلگەن ەرەكشە وكىلەتتىكتەردىڭ ۋاقىتشا جانە ماجبۇرلىكتەن تۋىنداعان ساياسي شارا ەكەنى دالەلدەندى. قازاقستاننىڭ ۇيلەسىمدى ىشكى ساياسي بولاشاعىنىڭ بىردەن-ءبىر كەپىلى دە ءدال وسى بيلىك تارماقتارى اراسىنداعى ويلاستىرىلعان تەپە-تەڭدىكتە جاتىر.
1996 -جىلدىڭ قاڭتارىندا پارلامەنت ءوز جۇمىسىنا كىرىستى.
