الەمدىك كوشباسشىلار قازاقستاندى تاۋەلسىزدىك مەرەكەسىمەن قۇتتىقتادى
نۇرسۇلتان نازاربايەۆتىڭ اتىنا قازاقستان رەسپۋبليكاسىنىڭ تاۋەلسىزدىگى كۇنىنە وراي شەت مەملەكەتتەردىڭ باسشىلارى مەن حالىقارالىق ۇيىمنىڭ جەتەكشىسىنەن قۇتتىقتاۋ جەدەلحاتتار كەلىپ ءتۇستى.
بىرىككەن ۇلتتار ۇيىمىنىڭ باس حاتشىسى انتونيۋ گۋتەرريش نۇرسۇلتان نازاربايەۆتىڭ اتىنا جولداعان جەدەلحاتىندا: «ءسىز ءۇشىن وسى ەرەكشە كۇنى مەن ەلىڭىزدىڭ بىرىككەن ۇلتتار ۇيىمىن نىعايتۋ جانە بارشامىز ءۇشىن بەيبىتشىلىكتى، دامۋ مەن ادام قۇقىعىن قامتاماسىز ەتۋ جونىندەگى ورتاق كۇش-جىگەرىمىزدى ىلگەرىلەتۋ ىسىنە بەلسەندى اتسالىساتىنىنا جانە ىقپال ەتەتىنىنە سەنىمدىمىن»، - دەپ جازعان.
گەرمانيا فەدەراتيۆتىك رەسپۋبليكاسىنىڭ پرەزيدەنتى فرانك-ۆالتەر شتاينمايەر ءوزىنىڭ قۇتتىقتاۋ جەدەلحاتىندا: «ديپلوماتيالىق قاتىناستار ورناعان ساتتەن بەرگى شيرەك عاسىر ىشىندە ەلدەرىمىزدىڭ اراسىنداعى ساياسي، ەكونوميكالىق، قوعامدىق جانە مادەني بايلانىستار كوپ سالالى ءارى سەرپىندى دامۋ جولىنا ءتۇستى. گەرمانيا الداعى ۋاقىتتا دا دەموكراتيا مەن زاڭ ۇستەمدىگىن نىعايتۋ ىسىندە قازاقستاننىڭ سەنىمدى سەرىكتەسى بولىپ قالا بەرمەك» - دەپ اتاپ وتكەن.
كانادانىڭ گەنەرال-گۋبەرناتورى جۋلي پايەتت ءوزىنىڭ قۇتتىقتاۋ حاتىندا قازاقستاننىڭ يادرولىق قارۋدى تاراتپاۋ باستاماسىنا قولداۋ كورسەتەتىنىن اتاپ ءوتىپ، ەلىمىزدىڭ بىتىمگەرشىلىك كۇش-جىگەرى مەن ءوڭىردى ءارى قاراي دامىتۋ ءۇشىن قولعا الىپ جاتقان شارالارى جونىندە ايتقان.
ءوزىنىڭ جەدەلحاتىندا قىرعىز رەسپۋبليكاسىنىڭ پرەزيدەنتى سوورونباي جەەنبەكوۆ قازاقستان- قىرعىزستان قارىم- قاتىناسى ءارى قاراي دا وداقتاستىق پەن ستراتەگيالىق سەرىكتەستىك رۋحىندا نىعايىپ، دامي بەرەتىنىنە سەنىم بىلدىرگەن.
سونداي-اق، مەملەكەت باسشىسىنا جانە قازاقستان حالقىنا باق-بەرەكە مەن ءوسىپ-وركەندەۋ تىلەگەن جەدەلحاتتاردى جاپونيا يمپەراتورى اكيحيتو، سينگاپۋر رەسپۋبليكاسىنىڭ پرەزيدەنتى حاليما ياكوب، اۆستريا رەسپۋبليكاسىنىڭ پرەزيدەنتى الەكساندر ۆان دەر بەللەن، مەكسيكا پرەزيدەنتى ەنريكە پەنيا نەتو، نيدەرلاند كورولى ۆيللەم- الەكساندر، كۋبا رەسپۋبليكاسى مەملەكەتتىك كەڭەسىنىڭ جانە مينيسترلەر كەڭەسىنىڭ ءتوراعاسى راۋل كاسترو رۋس جولداعان.
