شەتەلگە شىعاتىن قازاقستاندىقتار ءۇشىن موبيلدىك قوسىمشاسى ىسكە قوسىلدى
اتالعان جوبانىڭ باستى ماقساتى - شەتەلگە شىعاتىن قازاقستان ازاماتتارىنىڭ قاۋىپسىزدىگىن قامتاماسىز ەتۋ.
ول ءۇشىن موبيلدى قوسىمشاعا شەت ەلدەر تۋرالى اقپارات، بارعان مەملەكەتتە ءوزىن ۇستاۋ نورمالارى، قاۋىپتى جاعدايدا اتقارىلاتىن شارالار، توتەنشە جاعدايلار كەزىندەگى ەسكەرتۋلەر جانە تاعى باسقا ماڭىزدى مالىمەتتەر ەنگىزىلگەن. بۇدان بولەك، قوسىمشا پايدالانۋشىلارى وزدەرى بارعان ەلدىڭ سانيتارلىق-ەپيدەميولوگيالىق جانە قىلمىستىق جاعداي تۋرالى دەرەكتەردى تابا الادى. شەتەلگە كىرگىزۋگە جانە ودان شىعارۋعا تىيىم سالىنعان زاتتار تۋرالى اقپارات تا بار.
«ازاماتتارعا ىڭعايلى بولۋ ءۇشىن موبيلدىك قوسىمشادا شەت ەلدەردەگى ساقتاندىرۋ، مەديتسينالىق قىزمەت تۋرالى كەڭەستەر، پايدالى تەلەفون نومىرلەرى، سونداي-اق، مەديتسينالىق جانە ادۆوكاتتىق مەكەمەلەر تۋرالى اقپارات بار. قوسىمشا ارقىلى قازاقستان كونسۋلىمەن بايلانىسقا شىعىپ، ونلاين رەجيمدە توتەنشە جاعدايلار بويىنشا كونسۋلدىق كومەك الۋعا بولادى. كونسۋلدارعا دىبىستىق حابارلاما جىبەرۋگە، ءيا بولماسا، وزىڭە قوڭىراۋ شالسىن دەپ تاپسىرىس بەرۋگە بولادى. ەلەكتروندى حابارلاما جازۋ قىزمەتى دە قاراستىرىلعان»، - دەدى كونسۋلدىق قىزمەت دەپارتامەنتىنىڭ ديرەكتورى ارداق ماديەۆ بۇگىن ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
ونىڭ ايتۋىنشا، اتالعان ءموبيلدى قوسىمشا «سيفرلىق قازاقستان» باعدارلاماسى اياسىندا دايارلانىپ وتىر. بۇگىندە بۇنداي قوسىمشانى دامىعان مەملەكەتتەردىڭ ءبارى قولدانادى. ق ر سىرتقى ىستەر مينيسترلىگى موبيلدىك قوسىمشانىڭ قولدانىسقا ەنگىزىلگەنى جايىندا بارلىق كونسۋلدارعا حابار بەردى.
