ەۋروپارلامەنت قازاقستانمەن كەڭەيتىلگەن سەرىكتەستىك جونىندەگى كەلىسىمدى قولدادى

ستراستۋرگ. قازاقپارات - سەيسەنبى كۇنى فرانسيانىڭ ستراسبۋرگتەگى پلەنارلىق سەسسيا بارىسىندا ەۋروپالىق پارلامەنت قازاقستان مەن ەۋرووداق اراسىنداعى كەڭەيتىلگەن سەرىكتەستىك پەن ىنتىماقتاستىق تۋرالى كەلىسىمنىڭ قورىتىندىسىنا كەلىسىم بەردى، دەپ حابارلايدى «قازاقپارات» ح ا ا مەنشىكتى ءتىلشىسى.

2015 -جىلدىڭ 21 -جەلتوقسانىندا استانادا قول قويىلىپ، 2016 -جىلدىڭ 1 -مامىرىندا ۋاقىتشا قابىلدانعان كەڭەيتىلگەن سەرىكتەستىك جانە ىنتىماقتاستىق تۋرالى كەلىسىمگە 654 قاتىسۋشىنىڭ ىشىنەن 511 دەپۋتات قولداۋ ءبىلدىرىپ، داۋىس بەردى.

«كەلىسىم ورتالىق ازيانىڭ ماڭىزدى مەملەكەتىمەن ساياسي جانە ەكونوميكالىق ىنتىماقتاستىقتى نىعايتۋعا سەبەپكەر بولادى. ەۋروپالىق وداق قازاقستان ءۇشىن ءىرى ينۆەستور ءارى ونىڭ ساۋداداعى ماڭىزدى سەرىكتەسى»، - دەدى ەۋروپالىق پارلامەنتتىڭ ك س ى ك جونىندەگى نەگىزگى بايانداماشىسى، ە پ-تىڭ فينلياندياداعى دەپۋتاتى لييسا يااكونسااري.

جاڭا كەلىسىم ەكونوميكا مەن ساۋدادان جاپپاي جويۋ جانە لاڭكەستىك قارۋلاردىڭ تارالۋىنا قارسى ارەكەتكە دەيىن، كليماتتىق وزگەرىستەر سالاسىنداعى، دەنساۋلىق ساقتاۋ، مەملەكەتتىك قارجىنى باسقارۋ جانە سالىق سالۋ ت. ب. 29 سالا بويىنشا ىنتىماقتاستىق بايلانىستاردى قامتيدى.

ءوز كەزەگىندە ەۋروپالىق پارلامەنتتىڭ ورتالىق ازيا مەملەكەتتەرى دەلەگاتسياسىنىڭ جەتەكشىسى، ەپ- ءتىڭ لاتۆياداعى دەپۋتاتى يۆەتا گريگۋلە قازىرگى ۋاقىتتا ەۋروپالىق وداققا مۇشە- مەملەكەتتەردىڭ 18 ى (28 ىنىڭ ىشىندەگى) كەڭەيتىلگەن سەرىكتەستىك پەن ىنتىماقتاستىق كەلىسىمىن راتيفيكاتسيالاعانىن اتاپ ءوتتى.

ول قازاقستاننىڭ ەۋروپالىق پارلامەنتتىڭ تۇراقتى ءارى كونسترۋكتيۆتى سەرىكتەسى ەكەنىنە سەنىم ءبىلدىردى.