كانادا قازاقستاننىڭ انتيادرولىق باستامالارىنا قولداۋ ءبىلدىردى
ءىس-شارانى قازاقستاننىڭ كاناداداعى ەلشىلىگى، «يادرولىق قارۋسىزدانۋ جانە تاراتپاۋدى قولدايتىن پارلامەنتشىلەر (PNND)» جانە «يادرولىق قارۋعا تىيىم سالۋ تۋرالى كونۆەنسيانى قولدايتىن كانادالىقتار» ۇكىمەتتىك ەمەس ۇيىمى ۇيىمداستىردى.
ءوز بايانداماسىندا قازاقستان ەلشىسى كونستانتين جيگالوۆ قازاقستاندى جاھاندىق انتيادرولىق قوزعالىستىڭ كوشباسشىنا اينالدىرعان پرەزيدەنت نۇرسۇلتان نازاربايەۆتىڭ يادرولىق قارۋسىزدانۋ جانە تاراتپاۋ سالاسىنداعى نەگىزگى شەشىمدەرى مەن باستامالارىن جان- جاقتى اتاپ ءوتتى.
«يادرولىق قاۋىپ-قاتەرلەرمەن كۇرەسۋدىڭ مول تاجىريبەسىنە نەگىزدەلىپ، ەلىمىز انتيادرولىق تاقىرىپتى 2018 -جىلعى قاڭتار ايىنداعى ب ۇ ۇ قاۋىپسىزدىك كەڭەسىندەگى ءتوراعالىعىنىڭ باستى باسىمدىقتارىنىڭ ءبىرى رەتىندە بەلگىلەدى»، - دەپ ايتتى قازاقستاندىق ديپلومات.
ك. جيگالوۆ «ICAN» جۇمىسىنا بەلسەندى قاتىسىپ كەلگەن كانادا جۇرتشىلىعىن قۇتتىقتادى. حيروسيماداعى اتوم بومباسىنان زارداپ شەككەن كانادالىق بەلسەندى سەتسۋكو تۋرلوۋ اتالعان حالىقارالىق قوزعالىستىڭ اتىنان بيىلعى نوبەل سىيلىعىن الادى. سونىمەن قاتار، ۇيەڭكى جاپىراعى ەلىنىڭ ەڭ جوعارعى ازاماتتىق ماراپاتى بولىپ تابىلاتىن «كانادا وردەنىنىڭ» مىڭنان استام يەگەرلەرى حالىقارالىق قاۋىمداستىقتى يادرولىق قارۋعا تىيىم سالۋ تۋرالى كونۆەنسيانى ازىرلەۋ جونىندەگى ۇلەستەردى كۇشەيتۋگە شاقىراتىن پەتيتسياعا قول قويعانى جاريالاندى.
ءىس- شاراعا كانادا پارلامەنتى قاۋىمدار پالاتاسىنىڭ سپيكەرى دجەف ريگان، سپيكەردىڭ ورىنباسارى كەرول حيۋس، سەناتتىڭ حالىقارالىق ىستەر جانە سىرتقى ساۋدا كوميتەتىنىڭ ءتورايىمى رەينەل اندرەيچۋك، پارلامەنت دەپۋتاتتارى مەن سەناتورلار، يادرولىق قارۋعا تىيىم سالۋدى قولدايتىن كانادالىق ۇكىمەتتىك ەمەس ۇيىمدار جانە بۇقارالىق اقپارات قۇرالدارىنىڭ وكىلدەرى قاتىستى.
جينالعان قاتىسۋشىلار جاھاندىق جانە وڭىرلىك يادرولىق قاۋىپسىزدىكتى قامتاماسىز ەتۋگە باعىتتالعان قازاقستاننىڭ ۇلەسىنە جوعارى باعا بەرىپ، ب ۇ ۇ ق ك قۇرامىنداعى الداعى جۇمىستارىنا تابىس تىلەدى. كانادالىقتار يادرولىق قارۋدان ازات الەم قۇرۋ بويىنشا قوعامدىق قولداۋدى جۇمىلدىرۋعا باعىتتالعان اتوم جوباسىنىڭ قىزمەتىن دە قۇپتادى.
