باحتيار ارتايەۆقا حالىقارالىق جاڭا ماندات تابىستالدى
سپيدكە قارسى كۇرەس ايلىعى قارساڭىنا ورايلاستىرىلعان شارا بارىسىندا وليمپيادا چەمپيونى باحتيار ارتايەۆقا يۋنەيدس-تىڭ(ۆيچ/سپيد بويىنشا ب ۇ ۇ-نىڭ بىرىككەن باعدارلاماسى) قازاقستانداعى ارنايى ەلشىسىنىڭ مانداتى تابىس ەتىلدى، دەپ حابارلايدى قازاقپارات.
«بۇل قۇرمەتىنەن بولەك جاۋاپكەرشىلىگى دە زور جۇمىس. ويتكەنى ءبىز ا ي ت ۆ- پەن اۋىراتىن ادامداردىڭ جاعدايىن بىلەمىز. بۇل وتە كۇردەلى ماسەلە. ال ارنايى ەلشى رەتىندە ماعان جۇكتەلەتىن مىندەت - حالىق اراسىنا شىعىپ بۇل اۋرۋدان قاي جەردە ەمدەلۋگە بولاتىندىعىن، قالاي الدىن الۋ كەرەكتىگىن ءتۇسىندىرۋ، ناسيحاتتاۋ. ماسەلەن، مەنىڭ تۇسىنۋىمشە، كوپ ادامدار اۋرۋىن جاسىرىپ، وزدەرىن قوعامنان تىس قالعان جاندار رەتىندە تۇسىنەدى. سوندىقتان اسىرەسە جاستاردى سپورتقا، بىلىمگە بۇرىپ، پسيحولوگيالىق وڭالتۋ جۇمىستارىن جۇرگىزۋ قاجەت»، - دەدى باقتيار ارتايەۆ ماندات تاپسىرۋ راسىمىنەن كەيىن قازاقپارات تىلشىسىنە بەرگەن سۇحباتىندا.
بوكستان ەلىمىزدىڭ جەتى دۇركىن چەمپيونى، وليمپيادا چەمپيونى، ۆال باركەر كۋبوگىنىڭ يەگەرى قازاقستانداعى ارنايى ەلشىسى بولىپ قانا قويماي ەۋرازيا قۇرلىعىنداعى 15 كە جۋىق ەلدە دە جۇمىس ىستەيتىن بولادى. ياعني، اتالعان ەلدەردى دە ارالاپ، يۋنەيدس-پەن بىرگە ا ي ت ۆ- كە قارسى جۇمىستار جۇرگىزەدى. ايتا كەتەرلىگى، الداعى ۋاقىتتا باقتيار ماسكەۋگە بارىپ، ەلشى رەتىندە قاي باعىتتا جۇمىستار جۇرگىزەتىندىگىن تانىستىرادى.
«جوسپار بار. كرەاتيۆتى ادام بولعاننان كەيىن ويلار دا وتە كوپ. جاقسى كەڭەستەر بەرەمىن دەپ ويلايمىن. ماسكەۋدە جۇمىس باعىتىمدى تانىستىرعاندا ونى بىلە جاتاسىزدار»، - دەدى باقتيار ارتايەۆ.
ايتا كەتەيىك، الەم بويىنشا ءار جىل سايىن 2 ميلليونعا جۋىق ادام ا ي ت ۆ جۇقپاسىن جۇقتىرادى. ال استانا قالاسىندا وتكەن 11 ايدا جاڭادان 218 جاعداي انىقتالدى.
