قازاقستاندا ويىن بيزنەسىنە سالىق ەكى ەسەگە ءوسۋى مۇمكىن

استانا. قازاقپارات - بۇگىن پارلامەنت سەناتىنىڭ جالپى وتىرىسىندا جاڭا سالىق كودەكسىنىڭ جوباسىن جانە وعان ىلەسپە ەكى زاڭ جوباسىن تالقىلادى.

قۇجاتتارعا تۇزەتۋلەر ەنگىزىلگەندىكتەن، ولار ماجىلىسكە قايتارىلدى، دەپ حابارلايدى قازاقپارات.

«سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» ق ر كودەكسىنىڭ جوباسى، سونداي- اق سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» كودەكستى قولدانىسقا ەنگىزۋ تۋرالى، «ق ر كەيبىر زاڭنامالىق اكتىلەرىنە سالىق سالۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوبالارى سەنات وتىرىسىندا تالقىلانىپ، ءبىرىنشى وقىلىمدا ماقۇلداندى. تالقىلاۋ بارىسىندا جانە قۇجاتتاردى ەكىنشى وقىلىمعا دايىندىق كەزىندە جوبالارعا وزگەرتۋلەر مەن تولىقتىرۋلار ەنگىزۋ قاجەتتىگى تۋىندادى»، - دەپ ءتۇسىندىردى سەناتور داۋرەن ادىلبەكوۆ.

ونىڭ سوزىنە قاراعاندا، سالىق كودەكسى جوباسىنا قاتىستى ءتيىستى تۇزەتۋلەر قامتىلعان. بۇل رەتتە فارماتسيەۆتيكالىق قىزمەتتەر مەن ەسەپ بويىنشا جانە مەديتسينالىق سيپاتتاعى دارىلىك زاتتار مەن بۇيىمداردى ساتۋ قىزمەتتەرىن ق ق س- تەن بوساتۋ قاراستىرىلعان. بۇدان بولەك، تۇزەتۋلەردىڭ اراسىندا ويىن بيزنەسىنە سالىقتى ەكى ەسەگە ارتتىرۋ ەسكەرىلگەن. سونىمەن قاتار بۋكمەكەرلىك كەڭسەلەر ءۇشىن ەلەكتروندى كاسسا بويىنشا مولشەرلەمەلەردىڭ 1,5 ەسەگە ءوسۋى ەسكەرىلگەن.

جالپى وتىرىس بارىسىندا جاساعان بايانداماسىندا ۇلتتىق ەكونوميكا ءمينيسترى تيمۋر سۇلەيمەنوۆ كودەكس جوباسىندا يدەولوگيانى وزگەرتۋ، ىنتالاندىرۋ جانە اكىمشىلەندىرۋدى جەڭىلدەتۋ كوزدەلگەنىن اتاپ ءوتتى. «يدەولوگيا ادال سالىق تولەۋشىلەردى قورعاۋعا باعىتتالادى. ەكونوميكانىڭ ءار ءتۇرلى سالالارى ىنتالاندىرۋعا يە بولادى. اكىمشىلەندىرۋ جەڭىلدەتىلەدى جانە سالىقتى ءوز بەتىنشە تولەۋگە ىنتالاندىرادى»، - دەپ توقتالدى.

ونىڭ سوزىنە قاراعاندا، ءبىرىنشى باعىتتا شاعىن جانە ورتا بيزنەستى دامىتۋ شارالارى ەسكەرىلگەن. قولدانىستاعى ارنايى سالىق رەجىمدەرىن ساقتاۋ كوزدەلۋدە. سونىمەن قاتار پاتەنتتە مولشەرلەمە 2 پايىزدان 1 پايىزعا دەيىن تومەندەتىلەدى. بۇل مىندەتتى الەۋمەتتىك مەديتسينالىق ساقتاندىرۋدى ەنگىزۋگە بايلانىستى سالىقتىق جۇكتەمەنى تومەندەتۋ ءۇشىن جاسالۋدا.