قازاق جاستارى قىتاي مەن قازاقستاننىڭ مادەنيەتىن تانىستىرۋعا ۇلەس قوستى - شەتەلدەگى قازاق ءتىلدى ب ا ق- قا شولۋ
تىلەيحان المالىك ۇلى موڭعوليا ەنەرگەتيكا ينجەنەرلەر وداعىنىڭ پرەزيدەنتى بولىپ تاعايىندالدى - ulgiinews.mn
بۇل اقپاراتتى 30 -قاراشا كۇنى موڭعول ەلىنىڭ بايان- ولگي ايماقتىق ulgiinews.mn پورتالى مالىمدەدى. اتالعان اقپارات كوزىنىڭ مالىمەتىنشە، بەيسەنبى كۇنى موڭعوليا ەنەرگەتيكالىق ينجەنەرلەر وداعىنىڭ باسقارماسىنىڭ ءماجىلىسى وتكەن. ماجىلىستە وداقتىڭ پرەزيدەنتى لاۋازىمىنا ەنەرگەتيكا ۇيلەستىرۋ كوميتەتىنىڭ ءتوراعاسىنا تىلەيحان المالىك ۇلىن، ۆيتسە-پرەزيدەنتىنە ەلدىڭ كەڭەسشى ينجەنەرى ر. گانجۋۋر تاعايىندالعان.
تىلەيحان المالىك ۇلى، جىلدارى ەكى مارتە موڭعوليانىڭ زاڭ شىعارۋشى ورگانى - مەملەكەتتىك ۇلى حۋرال مۇشەلىگىنە (2008-2012 جانە 2012-2016 -جىلدار) سايلانعان. ول موڭعوليا قازاقتارىنىڭ اراسىنان شىققان زيالى ازاماتتارىمىزدىڭ ءبىرى.
سونداي-اق، وسى ulgiinews.mn-پورتالى تانىمال بۇركىتشى قىز ايشولپان نۇرعايىپ قىزىنا ايماقتىق پوليتسيا باسقارماسىنىڭ باسشىسى قۇرمەت كورسەتتى دەپ جازادى
«بۇركىتشى قىز» اتىمەن الەمگە ايگىلى بولعان بايان-ولگي ايماعىنداعى 11 -سىنىپ وقۋشىسى ايشولپان نۇرعايىپ قىزىنا 28 -قاراشا كۇنى ايماقتىق پوليتسيا باسقارماسى ارنايى قۇرمەت كورسەتكەن.
اتالعان اقپارات كوزىندە «پوليتسيا باسقارماسىنىڭ باستىعى، پودپولكوۆنيك ب. ءباتحۇۇ «ايەل ادام باتىل، ەرجۇرەك، سابىرلى دا شىدامدى، ورامدى بولاتىنىن دالەلدەپ، وتانىنىڭ جاقسى اتىن جەر جاھانعا تانىتقانىڭا زور العىس ايتا وتىرىپ، وقۋىڭ مەن ونەرىڭە تابىس تىلەيمىن!» دەپ سىي-قۇرمەت جاسادى دەپ جازىلعان.
ەستەرىڭىزگە سالا كەتەيىك، ايشولپاننىڭ ءوز ومىرىنەن الىنعان «بۇركىتشى» فيلىمى قاراشا ايىندا ا ق ش- تىڭ نيۋ- يورك قالاسىندا كورسەتىلگەن بولاتىن. ول ازيا قوعامى فەستيۆالىندە «ازيا قۇرلىعىن وزگەرتكەن ازامات» اتتى مارتەبەلى ماراپاتقا يە بولعان ەدى.
قازاق جاستارى قىتاي مەن قازاقستاننىڭ مادەنيەتىن تانىستىرۋعا ۇلەس قوستى - People Daily
قىتايلىق «جەنمين جيباو» اقپاراتتىق پورتالى وسىنداي مازمۇندا شاعىن ماقالا جاريالادى. «90 -جىلداردىڭ تۇلەگى» دەپ اتالعان قازاق جاستارى ەرنۇر مەن جاينا شىڭجاننىڭ نىلقى اۋدانىندا تۋعان. ەكەۋى شانحاي قالاسىنداعى تۇڭجي ۋنيۆەرسيتەتىنىڭ كاسىپ كوزىن اشۋ ورنىندا «ەلجاۋ مادەنيەت تاراتۋ» ج ش س جۇمىستارىن جۇرگىزە وتىرىپ، قىتاي مەن قازاقستان اراسىنداعى مادەنيەت سالاسىنداعى ىنتىماقتاستىققا وزدەرىنىڭ ۇلەستەرىن قوسقىسى كەلەدى.
«2015 -جىلى ەرنۇر شاڭحاي تۇڭجي ۋنيۆەرسيتەتىنىڭ مادەنيەت سالاسىنداعى ءوندىرىستى باسقارۋ كاسىبى بويىنشا وقۋىن ءتامامداپ قازاقستانعا ارنايى كەلگەن. سول كەزدە ول ەكى ەل اراسىنداعى ەكونوميكالىق قاتىناستار جاقسى جولعا قويىلعانىمەن، مادەني بايلانىستاردىڭ جەتكىلىكسىز ەكەنىن بايقايدى. سودان كەيىن قىتايعا قايتىپ كەلىپ، كاسىپ كوزىن اشپاق بولادى. 2016 -جىلى قىركۇيەكتە جاينا شىڭجانداعى تۇڭجي ۋنيۆەرسيتەتىنە اسپيرانتۋراعا قابىلدانعان سوڭ ەرنۇر قىزمەتىن تاستاپ، ەكەۋى بىرگە سەرىكتەستىك قۇرادى» دەپ جازادى اتالعان اقپارات كوزى.
People Daily-دىڭ مالىمەتىنشە، باسىندا كاسىپ كوزىن اشۋ جولى ەكى جاسقا وڭاي بولماعانىن، ءتۇرلى قارجىلىق كەدىرگىلەر، وتباسىنداعىلاردىڭ قولداماۋى سىندى جاعدايلار ولاردىڭ العاشقى ويلارىنان قايتۋىنا كەدەرگى بولا الماپتى. وسىنداي قيىندىق بولعان كەزدە ەرنۇر مەن جايناعا ۇستازدارى مەن كۋرستاستارى كومەك قولىن سوزىپ، جاقسى ۇسىنىستارىن بەرگەن. جاڭا قۇرىلعان سەرىكتەستىك تۇڭجي ۋنيۆەرسيتەتىنىڭ كاسىپ كوزىن اشۋشىلارعا كومەكتەسۋ قاراجاتى ارقىلى بىرتىندەپ ءوز جولىن تاپقان. قازىر ولار قىتايدىڭ مادەنيەت ونىمدەرىن قازاقستانعا قالاي جەتكىزۋدى ويلاستىرۋدا. سونىمەن بىرگە قازاقستاننىڭ الەۋمەتتىك جەلىلەرىندە اككاۋنت اشىپ، قىتاي مادەنيەتىن قازاقستانعا تانىستىرۋدى جوسپارلاپ وتىر.
شەتەلدىك تۋريستكە بۇركىتشىلەر فەستيۆالىندەگى ۇلتتىق ويىندار ۇناماي قالدى - kaznews.mn
موڭعوليالىق kaznews.mn پورتالىندا وسىنداي مازمۇندا اپتا سوڭىندا شاعىن ماقالا جاريالاندى. بۇل حابار بايان- ولگيي ايماعىندا 30- قىركۇيەكتە وتكەن ءداستۇرلى بۇركىتشىلەر فەستيۆالى تۋراسىندا بولعان. جازبانىڭ اۋەلگى اۆتورى سول بۇركىتشىلەر تويىنا كەلگەن شەتەلدىك تۋريست ەكەن. ول وزىنە اڭشىلاردىڭ كيىمدەرى مەن بۇركىتتەرى ۇناعانىمەن، بۇل جولعى بۇركىتشىلەردىڭ تويىندا بولعان كەيبىر جاعدايلاردىڭ كوڭىلىنە جاقپاعاندىعىن بىلدىرگەن.
«قىركۇيەكتىڭ 30 -كۇنى ۇيىمداستىرىلعان بۇركىتشىلەر تويىندا العان اسەرىمەن شەتەلدىك بلوگەر ليزا ءوزىنىڭ lisa.vanderzweep.be بلوگىندا ءبولىستى. بۇل جونىندەگى اقپاراتتى الەۋمەتتىك جەلىدەگى پاراقشامىزعا Megan Fitz-James حابارلادى» دەپ باستالادى ماقالا.
شەتەلدىك تۋريست بلوگەر ليزا بۇركىتشىلەر تويىندا العان اسەرىن بىلاي دەپ قالدىرادى: «...فەستۆالدىڭ ءبىرىنشى كۇنى جارىسقا قاتىسۋشىلار تىركەلىپ، العاشقى جارىستار باستالادى. ەڭ اۋەلى اڭشىلار بۇركىتتەرىن جىبەرۋگە ارنالعان جەرگە باردى. بۇركىتىمەن تاۋعا كوتەرىلىپ، ۋاقىتى كەلگەن كەزدە تومەن قاراي بوساتتى. بىزگە بۇل قيىن جۇمىس بولىپ كورىندى» دەيدى اۆتور.
ليزا ەسىمدى بلوگەرگە سول كۇنى وتكەن ساياتشىلىقتان وزگە «تۇيە جارىسى»، «قىز قۋۋ»، «تەڭگە ءىلۋ» سياقتى بىزگە ەڭ قىزىقتى سانالاتىن ۇلتتىق ويىندار ۇناماي قالعان سىڭايلى.
«كۇننىڭ قالعان بولىگىندە تۇيە جارىسى ءوتتى. بۇل تۋريستەر ءۇشىن تۇسىنىكسىز ءىس- شارا بولدى. «تەڭگە ءىلۋ» جانە «قىز قۋۋ» بولدى. ءبىز نە بولىپ جاتقانىن ءاردايىم بىلە بەرمەسەكتە، امالسىزدان سونىڭ ءبارىن تاماشالاپ ءجۇرۋدى ءجون كوردىك...» دەپ جازادى بلوگەر. kaznews.mn پورتالى اتالعان اقپاراتتىڭ سوڭىندا بۇل بۇركىتشىلەر تويىنىڭ جاعىمدى جاقتارىن جازعان تاعى شەتەلدىك بلوگەردىڭ ماقالاسىمەن بولىسكەن. الايدا ونى اۋدارماستان تەك سىلتەمەسىن بەرگەن. ول ماقالا اعىلشىن تىلىندە جازىلىپتى.
سونداي-اق «Megan Fitz-James تاعى ءبىر بلوگەردىڭ بۇركىتشىلەر فەستيۆالىنىڭ جاقسى تۇستارىن دارىپتەگەن ماقالاسىمەن ءبولىستى. ماقالانى وقۋ ءۇشىن سىلەمەگە باسىڭىز» دەپ تۇيىندەگەن.
شىڭجاننىڭ قۇمدى تىزگىندەۋ جوباسى تاكلاماكان شولەيتىن «جاپتى» - «تيانشاننەت»
شىڭجاننىڭ چەرچەن اۋدانىنىڭ الىپ تور ىسپەتتى قۇمدى تىزگىندەۋ تەحنولوگيالىق جوباسى تاكلامان قۇمدىعىن «ۇستادى». بۇل تۋرالى قىتايلىق http://kz.ts.cn اقپاراتتىق پورتالى مالىمدەدى. تاكلاماكان قۇمىنىڭ جيەگىنە ورنالاسقان چەرچەن اۋدانىنداعى قۇمدىقتىڭ كولەمى جالپى قۇمدى ءوڭىردىڭ %40 ىن يەلەيدى. ەكولوگيالىق جاسىل ايماقتى ۇشى- قيىرسىز قۇمدى ءشول كۇن سايىن جالماپ، قۇمدى بوران ازىناپ، ەكولوگيالىق ورتا بارىنشا ناشارلاعان ەدى.
جەرگىلىكتى بيلىك وسىمدىك جامىلعىسىن تورمەن توقىپ، اعىلعان قۇمدى تىزگىندەۋگە كۇش سالۋدا.
قۇمدىقتىڭ قالانى باسىپ قالۋىن توسۋ ءۇشىن چەرچەن اۋدانى 1998 -جىلى بوراننان ساقتانىپ، قۇمدى تىزگىندەۋ قىزمەت پۋنكتىن قۇرىپ، حىدۇڭ قۇمدى تىزگىندەۋ جوباسىن باستايدى. اتالعان جوبا بويىنشا 2017 -جىلى قاراشاعا دەيىن قۇمدى تىزگىندەۋ بازاسىنىڭ وسىرگەن ورمان اۋماعى 7400 گەكتارعا جەتكەن.
قازىر 8 كاسىپورىن قۇم كوشكىنىن توقتاۋدىڭ ەكولوگيالىق جوباسىنا قاتىسىپ، وسى تاسىلمەن 1500 گەكتارعا جۋىق جەردى قۇم باسۋىنىڭ الدىن العان.
ازىرەت سۇلتان مەشىتىنىڭ ۇلتتىق ناقىشتارى تۋريستتەردى قىزىقتىرۋدا - trt.net.tr
بۇل اپتادا ءدال وسىنداي تاقىرىپپەن تۇركيا راديو تەلەديدار پورتالى حابارلاعان بولاتىن. ناقتىراق ايتساق استاناداعى ازىرەت سۇلتان مەشىتىنىڭ ۇلتتىق ناقىش، ويۋ-ورنەكتەرى شەتەلدىك تۋريستتەردى قىزىقتىرۋدا.
«ورتالىق ازيانىڭ ەكىنشى ۇلكەن مەشىتى ازىرەت سۇلتان مەشىتىنىڭ ءىشى ۇلتتىق ناقىش، ويۋ-ورنەكتەرمەن بەزەندىرىلگەن. ...استانانىڭ تەڭدەسى جوق جانە كەرەمەت عيماراتتارى اراسىندا ورىن الادى. مەشىت 13 گەكتارلىق ءبىر الاڭعا يە. شامامەن 10 مىڭ ادامنىڭ عيبادات جاساۋىنا جاعداي جاسايتىن مۇنارالى مەشىت ءداستۇرلى حان سارايى ءتارىزدى» دەپ جازادى اتالعان اقپاراتتىق پورتال.
«ورتالىق ازيادا تۇرىكمەنستانداعى تۇرىكمەنباشى رۋحاني مەشىتىنەن كەيىنگى ەكىنشى ۇلكەن مەشىت بولعان ازىرەت سۇلتان مەشىتىن ارالاۋ ءۇشىن قىتايدان، يراننان، ەۋروپانىڭ ءارتۇرلى ەلدەرىنەن كوپتەگەن تۋريست كەلەدى.
قازاقستان رەسپۋبليكاسى پرەزيدەنتى نۇرسۇلتان نازاربايەۆ «ازىرەت سۇلتان» دەپ اتاعان مەشىتتىڭ كۇمبەز سانى - 10، ولاردىڭ ديامەترلەرى - 10,45 مەتر. ءتورت مۇنارانىڭ ءارقايسىسىنىڭ بيىكتىگى - 77 مەتر. مەشىتتە 26 تىرەك بار. مەشىت اۋماعىندا 745 كولىككە ارنالعان اشىق اۆتوتۇراق ورىن الادى» دەپ تولىقتاي تانىستىرادى trt.net.tr پورتالى.
اۆتور: بەيسەن سۇلتان ۇلى
