قىرىپسال قىراندار قانجىعا مايلادى
العاشقى كۇنى قولعا شاقىرۋ، شىرعاعا ءتۇسىرۋ بويىنشا ىرىكتەلگەن بۇركىتتەردى ەرتەڭىندە قويانعا، ءۇشىنشى كۇنى تۇلكىگە سالدى. ال، قارشىعا مەن يتەلگىنى كەپتەر مەن قويانعا جىبەردى.
ءار بۇركىتتىڭ تۇلكىگە ءارتۇرلى ءتۇسۋى، كەيبىرىنىڭ ۇستاپ الىپ ايىرىلىپ قالۋى، تاعى ءبىرىنىڭ اينالىپ كەلىپ توماعالى بۇركىتكە ءتۇسۋى، ەندى ءبىر بۇركىتتى ۇستاعان تۇلكىسىنەن اجىراتا الماي الاڭنان العان اڭىمەن قوسا كوتەرىپ الىپ كەتۋى سىندى كورىنىستەر جينالعان جۇرتقا وتە قىزىقتى بولسا كەرەك، وزدەرى قۇس سالعانداي ايقايلاپ، تاعاتى تاۋسىلعاندار تورەشىلەرگە «ءجون سىلتەپ» تە جاتتى.
فينالعا شىققان جەتى بۇركىتكە كورسەتىلگەن تۇلكىلەردىڭ ۇشەۋى قۇتىلىپ كەتتى. ەكەۋى ۇستاپ ايىرىلسا، ءبىر بۇركىت جەتە بەرىپ، تايقىپ شىعىپ توبەگە قوندى. بۇركىتتىڭ تەگەۋرىنىنە ىلىنبەي تاۋعا تارتىپ بارا جاتقان تۇلكىنى وڭاي جىبەرە سالعىسى كەلمەگەن كورەرمەندەر وزگە قۇسبەگىلەرگە، «بۇركىتىڭدى جىبەر دە، جىبەر» دەپ ايقايلاپ-اق باقتى. الايدا، ەرەجە بويىنشا ءبىر تۇلكىگە ءبىر عانا بۇركىت جىبەرىلەدى. بابى كەلمەگەن نەمەسە تۋمىسىنان ناشار بۇركىت جىبەرىلسە، ول - تۇلكىنىڭ باعى. وندايدا تۇلكى قۇتىلۋى كەرەك. بۇل اڭ اۋلاۋداعى قازاق بويىنداعى ەجەلدەن كەلە جاتقان ادىلەتتىلىكتى كورسەتسە كەرەك!
بۇل قانسوناردىڭ بۇرىنعى قانسونارلاردان تاعى ءبىر وزگەشەلىگى - قۇسبەگىلەر اراسىندا اساۋ ۇيرەتۋ، كوكپار، جامبى اتۋ، اۋدارىسپاق جانە ءان-كۇي، ولەڭ- جىردان ونەرلەرىن ورتاعا سالۋ بولدى.
«قازاقتا «جىگىتكە جەتى ونەر دە از» دەگەن ءسوز بار. قۇستىڭ ءتىلىن تاۋىپ، اڭ ىلدىرگەن ازاماتتاردان ات ۇستىندەگى بارلىق ونەر جانە بۇرىنعى سال- سەرىلەرىمىزدىڭ بويىنداعى ءان مەن كۇي، ولەڭ مەن جىردىڭ دا تابىلۋى كەرەك دەپ، وسى جولى ادەيى سال- سەرىلەرىمىزدىڭ اتىنداعى سىيلىقتار دايىندادىق»، دەيدى، «قىران» فەدەراتسياسىنىڭ اتقارۋشى ديرەكتورى، «جالايىر شورا» قۇسبەگىلەر مەكتەبىنىڭ ىرگەتاسىن قالاۋشىلاردىڭ ءبىرى باعدات مۇپتەكە قىزى. سول جەتى ونەر بويىنان تابىلعان تاتتىمبەت كاپ ۇلىنا ءبىرجان سال اتىنداعى، الدابەرگەن شارىپوۆكە اقان سەرى اتىنداعى، دۋلات اقانوۆقا قاپەز سال اتىنداعى ارنايى جۇلدە تابىستالدى. سونىمەن سىرىمبەت تاۋىنىڭ باۋىرىن قىزىققا بوكتىرگەن قانسوناردا كىل قىرىپسال قىراندار قانجىعا مايلادى.
بۇركىتتەر باسەكەسىندە استانالىق كۇنتۋعان سەرىكبايدىڭ «تۇيعىن» اتتى بۇركىتى I ورىندى يەلەندى. II ورىندى اتىراۋلىق ارمان كۇشقاروۆتىڭ «اقەدىلى» ەنشىلەسە، III ورىن جامبىلدىق سەرىكبولسىن جالعاس ۇلىنىڭ «قاپسالعانىنا» بۇيىردى. قارشىعالاردىڭ سايىسىندا الماتىلىق سەيىتجان بەكسۇلتاننىڭ «كوكجەندەت» اتتى قارشىعاسى I ورىندى يەلەندى. جامبىلدىق باباجان بەرىكبولسىننىڭ «قانجارى» II ورىن، الماتىلىق رينات مىرزابايەۆتىڭ «الاۋ» اتتى قارشىعاسى III ورىن الدى.
قۇسبەگىلەر جارىسىن قورىتىندىلاۋعا ۇلتتىق سپورتتىڭ قامقورشىلارى ورالباي ابدىكارىم، قانات احمەتوۆ، باعدات مۇپتەكە قىزى، الماتى وبلىسى اكىمىنىڭ ورىنباسارى جاقسىلىق ومار جانە «قىران» فەدەراتسياسىنىڭ پرەزيدەنتى نۇرلان ونەرباي جانە باسقالار قاتىسىپ، جەڭىمپازدارعا سىيلىق تابىستادى.
بۇل قانسوناردى «جالايىر شورا» قۇسبەگىلىك مەكتەبىنىڭ 30 جىلدىعىنا وراي مادەنيەت جانە سپورت مينيسترلىگى سپورت جانە دەنەشىنىقتىرۋ كوميتەتىنىڭ، ۇلتتىق سپورت تۇرلەرى قاۋىمداستىعىنىڭ جانە «قانسونار» اڭشىلاردىڭ قوعامدىق بىرلەستىكتەرى مەن اڭشىلىق شارۋاشىلىعى سۋبەكتىلەرىنىڭ رەسپۋبليكالىق قاۋىمداستىعىنىڭ قولداۋىمەن الماتى وبلىستىق تۋريزم، دەنەشىنىقتىرۋ جانە سپورت باسقارماسى مەن «قىران» فەدەراتسياسى ۇيىمداستىردى. قىرانداردىڭ پاتشاسى بۇركىت «اسپاندا ۇشسام قاناتىم تالادى، جەرگە قونسام جالايىر شورا الادى» دەپ جىلايدى ەكەن»، دەيدى ەل اراسىنداعى اڭىز.
وسى ءبىر اۋىز سوزبەن ەسىمى بۇگىنگە جەتىپ، اتىندا مەكتەپ اشىلىپ، سول ءبىر اۋىز ءسوز ارقىلى وسى ءبىر ايرىقشا قابىلەتتىڭ يەسى ءبىزدىڭ اتالارىمىز ەكەنىنە كوزىمىزدى جەتكىزدىك ەمەس پە؟! سودان دا ول قالىقتاي سامعاپ كەلىپ كوك اسپاننىڭ استىنداعى ماڭگىلىك ەلدىڭ كوك بايراعىندا ماڭگى قالقىپ تۇرعانداي!
ۇلاربەك نۇرعالىم ۇلى، «ەگەمەن قازاقستان» سۋرەتتەردى تۇسىرگەن سەرىك نۇردىباي
