ساۋلە دوسجانوۆانىڭ رومانى حالىقارالىق جۇلدەگە يە بولدى

استانا. قازاقپارات - شۆەتسيانىڭ ستوكگولم قالاسىندا التىنشى رەت وتكىزىلگەن ەۋرازيالىق حالىقارالىق اشىق ادەبيەت فەستيۆالى مەن كىتاپ فورۋمىنىڭ بايقاۋىندا جازۋشى ساۋلە دوسجانوۆانىڭ «وگەي جۇرەك» رومانى جۇلدەگە يە بولدى.

كىتاپتىڭ ءتۇپنۇسقاسى مەن اۋدارماسى ۇزدىك شىعارماشىلىق جۇمىس بولىپ تانىلىپ، كونكۋرستىڭ پروزا جانرى بويىنشا ءۇشىنشى ورىندى يەلەندى، دەپ حابارلايدى قازاقپارات.

فەستيۆالدى ازات ەلدەردىڭ تالانتتارىن شەتەل وقىرماندارىمەن تابىستىرۋ ماقساتىندا 38 مەملەكەتتەن تۇسكەن 1600 شىعارماشىلىق جۇمىستى تالداپ، ەلەكتەن وتكىزگەن ەۋرازيا شىعارماشىلىق گيلدياسى (لوندون) ۇيىمداستىرعان.

حالىقارالىق بايقاۋدا قازاقستانداعى باقتىگۇل ماحانبەتوۆا جەتەكشىلىك جاساپ وتىرعان «Bestseller KZ»  ءبىرىنشى ادەبي اگەنتتىگى ۇسىنعان سەگىز جۇمىس جۇلدە الدى. ولاردىڭ اراسىندا قازاق اقىنى عالىم جايلىباي «قارا ورامال» پوەماسىمەن پوەزيا جانرىندا ءۇشىنشى ورىنعا شىقتى.

ساۋلە دوسجانوۆانىڭ «وگەي جۇرەك» - موە چۋجوە سەردتسە» (ورىس تىلىنە اۋدارعان عۇسمان تولەعۇل) كىتابىندا قازاقستان تاۋەلسىزدىگى ارقاسىندا جۇزەگە اسىرىلعان مەديتسينا عىلىمىنداعى زاماناۋي جەتىستىك - جۇرەك الماستىرۋ وتاسىنىڭ تاريحى جايىندا باياندالادى.

«شەتەلدىك ادەبيەتشىلەرمەن زياتكەرلىك پىكىر الماسۋدى قالىپتاستىرۋ، ەڭ الدىمەن ادەبيەتشىلەردىڭ شىعارمالارىن ادەبي اۋدارۋ ارقىلى بايلانىس جاساۋ ەلىمىزدى الەمگە تانىتا ءتۇسۋدىڭ تاعى دا ءبىر جولى. الداعى ۋاقىتتا قازاق قالامگەرلەرىنىڭ ەڭبەكتەرى قۇرلىق اسىپ، قۇلاشىن جايسىن دەگەن تىلەكتەمىز»، - دەيدى ق ر ەڭبەك سىڭىرگەن قايراتكەرى ساۋلە دوسجانوۆا.