ولجاس سۇلەيمەنوۆ جاپونيا ۇكىمەتىنىڭ وردەنىمەن ماراپاتتالدى - فوتو
اتالعان وردەن استاناداعى جاپون يمپەراتورى احيكيتونىڭ تۋعان كۇنى قۇرمەتىنە ۇيىمداستىرىلعان جاپونيا ەلشىلىگىنىڭ سالتاناتتى قابىلداۋى اياسىندا تابىس ەتىلدى.
جاپونيانىڭ قازاقستانداعى ەلشىسى يتيرو كاباۆاتا قوناقتاردى جاپونيا مەن قازاقستان اراسىندا ورناتىلعان ديپلوماتيالىق قارىم- قاتىناستاردىڭ 25 جىلدىعىمەن قۇتتىقتادى جانە ەكى ەلدىڭ بەيبىتشىلىك پەن يادرولىق قارۋسىزدانۋ جولىندا بىرلەسە قىزمەت ەتىپ كەلە جاتقاندارىن اتاپ ءوتتى.
«بيىل جاپونيا مەن قازاقستان ب ۇ ۇ قاۋىپسىزدىك كەڭەسىنىڭ تۇراقتى ەمەس مۇشەلەرى رەتىندە بەيبىتشىلىك پەن حالىقارالىق قاۋىمداستىقتىڭ قاۋىپسىزدىگى جولىندا بىرلەسە قىزمەت اتقارۋدا. يادرولىق قارۋسىزدانۋ مەن يادرولىق قارۋدىڭ تاراتىلماۋى قازاقستان مەن جاپونيا قاتىناستارىنىڭ نەگىزى بولىپ تابىلادى. سوندىقتان جاپونيا ۇكىمەتى «نەۆادا- سەمەي» حالىقارالىق يادرولىق قارۋعا قارسى قوزعالىستىڭ پرەزيدەنتى ولجاس سۇلەيمەنوۆتى يادرولىق قارۋدى تاراتپاۋ سالاسىنداعى ىنتىماقتاستىق ارقىلى ەكى ەل اراسىنداعى دوستىق قاتىناستاردىڭ دامۋىنا زور ۇلەس قوسقانى ءۇشىن جاپون ۇكىمەتىنىڭ «كۇنشىعىس، التىن شۋاق وردەنىمەن» ماراپاتتالدى»، - دەدى يتيرو كاباۆاتا استانادا وتكەن جاپونيا ەلشىلىگىنىڭ قابىلداۋىندا.
ءوز كەزەگىندە ولجاس سۇلەيمەنوۆ جاپونياعا دەگەن شەكسىز قۇرمەتىن جەتكىزدى.
«مەن قازاقستاندا جانە ەۋروپادا جاپونيا ەلشىلىكتەرىنىڭ ءتۇرلى قابىلداۋلارىندا بولدىم. ال بۇگىن ءبىرىنشى رەت وردەنمەن قايتقالى تۇرمىن. جاپونياعا بىرنەشە رەت ساپارلاپ بارعانمىن، العاش بارعان ساتتەن بەرى جاپون حالقىن، جاپون مادەنيەتىن، ونىڭ ۇلكەن زياتكەرلىك جانە رۋحاني الەۋەتىن ەرەكشە قۇرمەتتەيمىن»، - دەپ اتاپ ءوتتى ولجاس سۇلەيمەنوۆ.
اتاپ وتكەن ءجون، ولجاس سۇلەيمەنوۆ - جاپونيانىڭ ماراپاتىن العان ءۇشىنشى قازاقستاندىق.
2008 -جىلى قازاقستان پرەزيدەنتى نۇرسۇلتان نازاربايەۆ «ۇلكەن لەنتاداعى حريزانتەما وردەنىمەن» ماراپاتتالسا، 2006 -جىلى - قازاقستانداعى جاپون تۇتقىنداردىڭ زيراتىن ىزدەۋمەن اينالىسقان تاريحشى اسقانبەك الدانازاروۆ «كۇنشىعىس، التىن شۋاق وردەنىمەن» ماراپاتتالعان.
