ازەربايجان تۋرالى كىتاپ قازاق تىلىندە جارىق كوردى
«بۇگىن تاعى ءبىر كىتاپتىڭ تانىستىرىلىمى بولدى. ونىڭ اۆتورى ازەربايجان پرەزيدەنتىنىڭ كومەكشىسى، پروفەسسور ءالي عاسانوۆ. بۇل ەڭبەكتىڭ ءبىزدىڭ ەلدەرىمىز ءۇشىن ماڭىزدىلىعى مەن ءمانىن ايتىپ وتكىم كەلەدى. كىتاپتىڭ بولاشاق ايماقتانۋشىلار مەن گەوساياسات، گەوەكونوميكامەن اينالىساتىن ماماندار ءۇشىن تاپتىرماس كومەكشى قۇرال بولاتىنى ءسوزسىز. وقۋلىقتا ازەربايجاننىڭ سوڭعى 20 جىلداعى ساياسي جانە ەكونوميكالىق ستراتەگيالارى اشىق جازىلعان»، - دەدى ازەربايجان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى راشاد ماممادوۆ.
ەلشىنىڭ ايتۋىنشا، جەلتوقسان ايىنىڭ ءبىرىنشى ون كۇندىگىنەن باستاپ ءال-فارابي اتىنداعى قازاق ۇلتتىق ۋنيۆەرسيتەتىندە ازەربايجان مادەنيەتىمەن تانىستىراتىن قازاقستانداعى ءۇشىنشى ورتالىق اشىلادى. وندا جاس ماماندار مەن عالىمدار اتالعان ەل تۋرالى اقپاراتتارمەن قازاق تىلىندە تانىسۋ مۇمكىندىگىنە يە بولماق.
