سانتياگو كالاتاۆرا: استانانىڭ شاپشاڭ دامۋى تاڭعالدىرادى
قازاقستان پرەزيدەنتى كەزدەسۋ بارىسىدا استانا بىرەگەي ساۋلەتىمەن جانە ءومىر ءسۇرۋ ءۇشىن جاسالعان قولايلىلىعىمەن عانا ەمەس، سونداي-اق قايتالانباس اتموسفەراسىمەن ەرەكشەلەنەتىنىن اتاپ ءوتتى.
«ەلوردادا تۇرعىسى كەلەتىن ازاماتتاردىڭ سانى ارتىپ كەلەدى. قالا حالقىنىڭ سانى ءبىر ميلليونعا جاقىندادى. كەلەر جىلى ءبىز استانانىڭ 20 جىلدىعىن اتاپ وتەمىز»، - دەدى نۇرسۇلتان نازاربايەۆ اقورداداعى كەزدەسۋدە.
بۇدان بولەك نۇرسۇلتان نازاربايەۆ ايگىلى يسپان ساۋلەتشىنىڭ ەڭبەكتەرىمەن تانىسقانىن ايتتى.
«پرەزيدەنت مىرزا، الدىمەن وسىندا كەلگەنىمىزگە قۋانىشتى ەكەنىمىزدى ايتقىم كەلەدى. استانا قالاسىنىڭ تەز دامىپ، ءوسىپ جاتقانىنا تاڭىرقاي قاراعانىمىز راس. بۇگىن سىزدەرمەن ءوزىمىزدىڭ باي، 36 جىلداي قالىپتاسقان تاجىريبەمىزبەن بولىسكىمىز كەلەدى. ماسەلەن، ءبىزدىڭ كومپانيا بۇگىندە الەمنىڭ 20 مەملەكەتىندە جۇمىس ىستەيدى. سونىڭ ىشىندە بىرنەشە الىپ ينفراقۇرىلىمنان تۇراتىن جوبالارىمىز بار. مىسالى، افينىداعى وليمپيادالىق نىسانداردى، ليسسابونداعى EXPO كورمەسىنىڭ كەشەندەرىن ايتا كەتەر ەدىم»، - دەدى يسپان ساۋلەتشىسى ەلباسىمەن كەزدەسۋىندە.
ايتا كەتەيىك، ايگىلى يسپان ساۋلەتشىسى جانە ءمۇسىنشى سانتياگو كالاتراۆا الەمنىڭ ءتۇرلى ەلدەرىندەگى كوپتەگەن فۋتۋريستىك نىساننىڭ اۆتورى رەتىندە تانىمال.
