مەملەكەتتىك قىزمەتشىلەردىڭ ءدىني ۇستانىمىنا قاتىستى ناقتى ءۇش شەكتەۋ بولادى - مينيستر ەرمەكبايەۆ
«ءبىز مەملەكەتتىك قىزمەتشىلەردىڭ ءدىني ۇيىمداردىڭ مۇددەسى ءۇشىن قىزمەت ەتكەنى ءۇشىن ناقتى جاۋاپكەرشىلىكتى ەنگىزۋدى كوزدەيمىز. سەبەبى قازاقستان - زايىرلى مەملەكەت، بۇل جەردە بارلىق دىندەردىڭ دارەجەسى تەڭ. بىزدە رەسمي ءدىن جوق، بارلىق كونفەسسيالارلىڭ قۇقىعى بىردەي. سوندىقتان ءبىز مەملەكەتتىك قىزمەتتەگى ادامدارعا ءدىني كوزقاراسقا قاراي ىقپال ەتۋگە جول بەرمەۋىمىز كەرەك. ونداي نورمانى مەملەكەتتىك قىزمەت تۋرالى زاڭعا ەنگىزۋ جوسپارلانىپ وتىر. وسى نورمانى بۇزعانى ءۇشىن تارتىپتىك جازا قولدانىلادى»، - دەدى ق ر ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ بۇگىن ديپلوماتيالىق كورپۋسپەن كەزدەسۋ كەزىندە.
ءمينيستردىڭ ايتۋىنشا، مەملەكەتتىك قىزمەتشىلەر ءۇشىن ناقتى ءۇش شەكتەۋ بولادى. بىرىنشىدەن، قانداي دا ءبىر ءدىني ۇيىمنىڭ مۇددەسى ءۇشىن قىزمەت بابىن پايدالانۋعا رۇقسات جوق. ەكىنشىدەن، ارىپتەستەردى بەلگىلى ءبىر ءدىني ۇيىمعا كىرۋگە ۇندەگەنى ءۇشىن جاۋاپكەرشىلىك ەنگىزىلەدى. ۇشىنشىدەن، مەملەكەتتىك قىزمەتشىلەرگە ءدىني ۇيىمنىڭ مۇشەلىگىنە وتۋگە بولمايدى. «ونىمەن ءبىز مەم قىزمەتشىلەرگە مەشىتتەر جانە تاعى باسقا عيبادات ورىندارىنا بارۋعا تىيىم سالىپ وتىرعان جوقپىز. جاڭاعى ءۇش شەكتەۋ عانا بولادى»، - دەپ اتاپ كورسەتتى ەرمەكبايەۆ.
ايتا كەتەيىك، ق ر سىرتقى ىستەر مينيسترلىگىندە وتكەن باسپا ءسوز ءماسليحاتىندا ق ر ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ ەلشىلەر ءۇشىن ارنايى باسپا ءسوز ءماسليحاتىن وتكىزدى. مينيستر ءدىني قىزمەت جانە ءدىني بىرلەستىكتەرگە ارنالعان زاڭناماعا قانداي وزگەرىستەردىڭ ەنگىزىلەتىنىن كەڭىنەن ايتىپ بەردى.
اۆتور: ارمان اسقاروۆ
