گەرمانيا قازاقستانمەن ىنتىماقتاستىقتى نىعايتۋعا مۇددەلى

ورال. قازاقپارات - گەرمانيا فەدەراتيۆتى رەسپۋبليكاسىنىڭ الماتى قالاسىنداعى باس كونسۋلى يورن روزەنبەرگ باستاعان دەلەگاتسيا باتىس قازاقستان وبلىسىندا بولدى، دەپ حابارلايدى «قازاقپارات» ءتىلشىسى.

ساپار بارىسىندا باس كونسۋل وبلىس اكىمى التاي كولگىنوۆپەن كەزدەسىپ، تاراپتار ەكونوميكا جانە باسقا دا سالالارداعى ىنتىماقتاستىقتى دامىتۋ ماسەلەلەرىن تالقىلادى.

كەزدەسۋدە ءوڭىر باسشىسىنىڭ اتاپ وتكەنىندەي، قازىرگى تاڭدا مەملەكەت شەتەلدىك ينۆەستورلار ءۇشىن كوپتەگەن مۇمكىندىكتەرگە جول اشىپ وتىر.

ەلباسىنىڭ تاياۋدا سوچيدە گەرمانيانىڭ جەتەكشى كاسىپكەرلەرىمەن باس قوسقانى بەلگىلى. وسى ورايدا باتىس قازاقستاندىق كاسىپورىندار دا نەمىس كومپانيالارىمەن بۇرىننان بار بايلانىستى كەڭەيتە تۇسۋگە ىقىلاستى.

وبلىستىڭ ەۋروپا مەملەكەتتەرىمەن، سونىڭ ىشىندە گەرمانيامەن تاۋار اينالىمى ۇلعايا تۇسسە، بۇدان ەكى جاق تا ۇتادى. ەڭ باستىسى، قازاقستاندىق جانە گەرمانيالىق كاسىپكەرلەردىڭ ءوزارا تاجىريبە الماسىپ، ىسكەرلىك قارىم-قاتىناس جاساۋىن جالعاستىرا بەرۋ كەرەك.

باتىس قازاقستاندىقتار نەمىس كاسىپورىندارىمەن بىرلەسىپ جۇمىس جاساۋعا دايىن. ورالدا «كۆانت» ج ش س، ءۇي قۇرىلىسى كومبيناتى سەكىلدى كاسىپورىندار ءوز وندىرىسىندە وزىق نەمىس تەحنولوگيالارىن پايدالانۋدا.

سونىمەن قاتار ورال مەن ماگدەبۋرگ قالالارى اراسىندا دا جاقسى بايلانىس ورنىققان. باس كونسۋلدىڭ سوزىنە قاراعاندا، ەكىجاقتى قارىم-قاتىناستار ساياسي، ەكونوميكالىق، مادەني، عىلىمي، ياعني بارلىق سالالاردى قامتيدى.

«ءبىز ىنتىماقتاستىقتى نىعايتۋعا مۇددەلىمىز. سەرىكتەستىك تە جوعارى دەڭگەيدە دامىپ كەلەدى. قازاقستان پرەزيدەنتى نۇرسۇلتان نازاربايەۆ گەرمانيادا بىرنەشە رەت بولدى. گەرمانيالىق ساياساتكەرلەر دە قازاق جەرىنە اياق باستى. بيىل گەرمانيا كانتسلەرى انگەلا مەركەل استاناداعى «ەكسپو-2017» كورمەسىندە بولدى.

مەن ءوزىم قازاقستاندا 15 ايدان بەرى قىزمەت ەتىپ كەلەمىن. بۇل - باتىس قازاقستانعا ءبىرىنشى ساپارىم. ماقساتىمىز - كاسىپورىندار مەن وقۋ ورىندارىندا بولىپ، ءوڭىردىڭ ينۆەستيتسيالىق مۇمكىندىكتەرىمەن تانىسۋ»، - دەدى يورن روزەنبەرگ.