مەملەكەت ەسەبىنەن بايىعان تۇلعا ۇرلانعان قاراجاتتى شەتەلدە پايدالانا الماۋى كەرەك - قوجامجاروۆ

استانا. قازاقپارات - بۇگىن مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنىڭ ءتوراعاسى قايرات قوجامجاروۆ سىبايلاس جەمقورلىققا قارسى ءىس- قيمىل ۇلتتىق بيۋروسى جانە ونىڭ اۋماقتىق بولىمشەلەرىنىڭ جەكە قۇرامىنىڭ قاتىسۋىمەن ءماجىلىس وتكىزدى، دەپ حابارلايدى ۆەدومستۆونىڭ باسپا ءسوز قىزمەتى.

وندا قايرات قوجامجاروۆ سىبايلاس جەمقورلىققا قارسى قىزمەت وفيتسەرلەرىنە مەملەكەت باسشىسىنىڭ 20 قاراشادا كەزدەسۋ بارىسىندا بەرگەن تاپسىرمالارىن جەتكىزدى.

«ءبىزدىڭ مىندەت - قوعام ءومىرىنىڭ بارلىق سالالارىندا جەمقورلىقپەن ءتيىمدى كۇرەسۋدى قامتاماسىز ەتۋ. ول الەۋمەتتىك، اۋىلشارۋاشىلىق، قۇرىلىس ماسەلەلەرى، كەن يگەرۋ، قارجى جانە كۆازيمەملەكەتتىك سەكتورلار، قۇقىققورعاۋ، سوت ورگاندارى جانە باسقا دا سالالار» - دەدى

ق. قوجامجاروۆ.

سونداي-اق، ءتوراعا سىبايلاس جەمقورلىققا قارسى قىزمەتتىڭ ءتيىمدى جۇمىس اتقارۋىنا قاجەتتى جاعداي مەن قۇرالدار بار ەكەنىن اتاپ ءوتتى.

باسىم مىندەتتەرگە قىلمىستىق تىزبەكتىڭ بارلىق قۇرامىن، ياعني ورىنداۋشىدان ۇيىمداستىرۋشىعا دەيىن اشكەرەلەۋ قويىلدى.

«ەلباسى سىبايلاس جەمقورلىققا قارسى قىزمەتكە جەمقورىق كورىنىستەرىن كىم جاساسا دا، ونىمەن قاتال كۇرەسۋدى مىندەت ەتىپ قويدى» - دەدى ق. قوجامجاروۆ.

مەملەكەتتىڭ ەكونوميكالىق قاۋىپسىزدىگىن قامتاماسىز ەتۋگە ەرەكشە كوڭىل ءبولىندى.

وسى باعىتتا ۇلتتىق بيۋروعا بيۋدجەت قاراجاتىنىڭ ماقساتتى جۇمسالۋىنا باقىلاۋدى كۇشەيتۋ تاپسىرىلدى.

«ايىپتى تۇلعالاردىڭ مۇلىگىنە تىيىم سالۋ جانە شەتەلدەگى زاڭسىز اكتيۆتەرىن انىقتاۋ ارقىلى مەملەكەتتىڭ ۇرلانعان قاراجاتىن تولىعىمەن ءوندىرۋدى قامتاماسىز ەتۋ كەرەك. مەملەكەت ەسەبىنەن زاڭسىز بايىعان بىردە- ءبىر تۇلعا ۇرلانعان قاراجاتتى نە قازاقستاندا، نە شەتەلدە پايدالانۋعا مۇمكىندىگى بولماۋى كەرەك»، - دەپ كورسەتتى ءتوراعا.