پاۆلوداردىڭ جاسىمىعى تۇركياعا ەكسپورتتالادى

 استانا. قازاقپارات - پاۆلودار وبلىسىنىڭ اكىمى بولات باقاۋوۆ تۇركيانىڭ ونەركاسىپ جانە كاسىپكەر- ايەلدەر كونفەدەراتسياسىنىڭ پرەزيدەنتى نەزاكەت ەمينە اتاسويمەن كەزدەسۋدە اۆلوداردىڭ جاسىمىعى تۇركياعا ەكسپورتتالاتىنىن ايتتى.

pavlodarnews.kz پورتالىنىڭ مالمەتىنە قاراعاندا، تاراپتار وبلىستىق كاسىپكەرلەر پالاتاسىندا كەزدەسكەن.

ايماق باسشىسى مارتەبەلى مەيمانمەن سۇحبات بارىسىندا پاۆلودار وبلىسى مەن تۇركيا مەملەكەتى اراسىنداعى تاۋار اينالىمى 64 ميلليون دوللارعا جەتكەنىن تىلگە تيەك ەتتى. ونىڭ ىشىندە اليۋمينيي ەكسپورتى 61 ميلليون دوللار بولعان.

سونداي- اق، ول ەرتىس ءوڭىرى تۇركيالىق تاراپپەن ىسكەرلىك قارىم- قاتىناسقا مۇددەلى ەكەندىگىن ايتىپ، ونەركاسىپتە، تۋريزمدە، مەديتسينا مەن اۋىل شارۋاشىلىعى سالاسىندا ارىپتەستىك ورناتۋعا ۇسىنىس ءبىلدىردى.

«تۇركياعا كوپ مولشەردە جاسىمىق ەكسپورتتالادى. بىزدەگى اقپارات بويىنشا تەك كانادانىڭ ءوزى جىل سايىن 80 مىڭ توننا جەتكىزىپ وتىر. ساپا جاعىنان ءبىزدىڭ جاسىمىق كانادالىق داقىلدان كەم تۇسپەيدى، پاۆلودارلىق اۋىل شارۋاشىلىعى تاۋار وندىرۋشىلەرى بۇل باعىتتا باسەكەلەستىككە تۇسە الادى. ءبىز تۇركيا ەلىنە بۇل ءداندى داقىلدى جەتكىزۋگە ءازىرمىز» - دەدى بولات باقاۋوۆ.