19:40, 22 - قاراشا 2017 | GMT +6
تاعى ءبىر بۇركىتشى قازاق قىزى شەتەلدىك رەجيسسەرلەردىڭ نازارىنا ىلىكتى
استانا. قازاقپارات - تاعى ءبىر بۇركىتشى قازاق قىزى شەتەلدىك رەجيسسەرلەردىڭ نازارىنا ىلىكتى، دەپ حابارلايدى قازاقپارات.
موڭعوليانىڭ KAZNEW پورتالىنداعى مالىمەتتەرگە نەگىزدەلسەك، بۇل جولى سينگاپۋرلىق رەجيسسەرلەر موڭعولياداعى بۇركىتشى قازاق قىزى ايگەرىم اسكەر قىزى تۋرالى فيلم ءتۇسىرۋدى قولعا الماق.
«بايان-ولگەي ايماعىنىڭ التاي اۋىلىندا وتكەن بۇركىتشىلەر فەستيۆالىن شەتەلدەن كوپتەگەن تۋريستەر كەلىپ تاماشالادى. ولاردىڭ اراسىندا سينگاپۋرلىق رەجيسسەرلەر دە كەلگەن بولاتىن. ولار فەستيۆالدە ءتورتىنشى ورىندى يەلەنگەن ايگەرىم اسكەر قىزى تۋرالى فيلم تۇسىرمەك»، دەپ جازادى دەرەككوز.
ايگەرىم اسكەر قىزى - التاي اۋىلىنداعى ورتا مەكتەپتىڭ 7-سىنىبىندا وقيدى. سەگىز جاسىندا اكەسىمەن بىرگە قۇسبەگىلىك ونەرگە ۇيرەنگەن.
ەستەرىڭىزگە سالساق، بۇدان بۇرىن ا ق ش رەجيسسەرلەرى بۇركىتشى ايشولپان نۇرعايىپ قىزى تۋرالى دەرەكتى فيلم ءتۇسىرىپ، الەمگە تانىمال ەتكەن.
