استانادان توكيو، شاڭحاي جانە نيۋ- يورككە تىكەلەي اۋە رەيستەرى اشىلادى
ق ر ۇكىمەتى قاۋلىسىنا سايكەس، استانا قالاسىندا ءتۋريزمدى دامىتۋ جونىندە 2020 -جىلعا دەيىنگى جول كارتاسى بەكىتىلىپ جاتىر. ناقتى وسى قۇجاتتا 2020 -جىلعا دەيىن استانادان توكيو، شاڭحاي جانە نيۋ- يورك قالالارىنا تىكەلەي اۋە رەيستەرىن اشۋ جوسپارلانعانى كورسەتىلگەن. سونىمەن بىرگە، 2019 -جىلعا دەيىن ۇشۋ گەوگرافياسى مەن رەيستەردىڭ سانىن ارتتىرۋ ءۇشىن شەت ەلدەردىڭ اۆياتسيالىق بيلىگىمەن كەلىسىمدەرگە وتىرۋ كوزدەلگەن. جول كارتاسى بويىنشا 2017 -جىلدىڭ جەلتوقسان ايىنا دەيىن كەمشىلىكتەردى انىقتاپ، نەگىزگى باسەكەلىك ارتىقشىلىقتاردى ايقىنداۋ ءۇشىن استانا قالاسىنىڭ كلينيكالارىنداعى مەديتسينالىق قىزمەتتەردىڭ جانە شەتەلدىك ازاماتتارعا كورسەتىلەتىن مەديتسينالىق قىزمەتتەردىڭ ساراپتاماسىن جۇرگىزۋ كوزدەلگەن.
2018 -جىلدىڭ قاڭتار ايىنا دەيىن شەتەلدىكتەرگە مەديتسينالىق قىزمەت كورسەتەتىن استانا قالاسىنىڭ نەگىزگى دەنساۋلىق ساقتاۋ ۇيىمدارىنىڭ ءتىزىمى جاسالماق. بۇعان قوسا 2018 -جىلدىڭ 1 - توقسانىندا مەديتسينالىق تۋريزم مەن يمپورتتى الماستىرۋ باعىتى بويىنشا يننوۆاتسيالىق مەديتسينالىق تەحنولوگيالارعا قاتىستى ۇسىنىستاردى ەنگىزۋ جوسپارلانۋدا. كەلەسى جىلدىڭ ماۋسىمىنا دەيىن WMTA ۇرانىمەن استانادا مەديتسينالىق تۋريزم تاقىرىبىندا حالىقارالىق كونفەرەنسيا وتكىزىلمەك.
اۆتور: ايان بەكەن ۇلى
