قىتاي كومپانيالارى وڭتۇستىك قازاقستاندا تۋريزمدى دامىتپاق - فوتو
وبلىس اكىمى جانسەيىت تۇيمەبايەۆ باستاعان توپ اۋەلى ۇلتتىق ونەردى تاماشالادى. شەتەلدىك قوناقتار حالىقتىق كاسىپ پەن قولونەر بۇيىمدارىن تاماشالاپ، قازاق اندەرىن تىڭدادى، كونە شاھار تاريحىمەن تانىستى، دەپ حابارلايدى قازاقپارات ءوڭىر باسشىسىنىڭ باسپا ءسوز قىزمەتىنە سىلتەمە جاساپ.
ايتا كەتەيىك، بيىل تۇركىستان قالاسى تۇركى الەمىنىڭ مادەني استاناسى اتانعانىن ايتتى.
«تۇركىستان - قاسيەتتى ءارى كونە قالالارىمىزدىڭ ءبىرى. ەر تۇرىكتىڭ التىن بەسىگى بولعان تۇركىستان بۇرىن قانداي ماڭىزعا يە بولسا، بۇگىنگى تاڭدا دا سونداي. ىرگەتاسى 15-عاسىردا قالانعان كەسەنە حالىقارالىق يۋنەسكو ۇيىمىنىڭ تىزىمىنە ەنگەن. مۇندا جىل سايىن مىڭداعان تۋريس كەلەدى. الداعى ۋاقىتتا ءبىرشاما جۇمىستار اتقارىپ، مەجەنى ارتتىراتىن بولامىز»، - دەدى جانسەيىت قانسەيىت ۇلى.
ودان سوڭ دەلەگاتسيا توبى قوجا احمەت ياساۋي كەسەنەسىنە ات باسىن بۇردى. ونداعى كونە جادىگەرلەر مەن قازاق حالقىنىڭ تاريحي تۇلعالارىمەن تانىستى. ارنايى توپتى باستاپ كەلگەن ق ح ر- دىڭ مەملەكەتتىك تۋريزم باسقارماسى ءتوراعاسىنىڭ ورىنباسارى دۋ جياڭ وڭتۇستىك قازاقستان وبلىسىندا تۋريزمدى دامىتۋ ءۇشىن ارىپتەستىك تانىتاتىنىن جەتكىزدى.
«كەز كەلگەن ايماقتىڭ شىرايىن اشاتىن ەڭ اۋەلى - ادامى. بۇل تۇرعىدا مەن وڭتۇستىك قازاقستان حالقىنىڭ قوناقجايلىلىعىنا، جىلى شىرايلى ادامدارىنا ءتانتى بولدىم. بۇل - تۋريزمدى دامىتۋ ءۇشىن اسا قاجەتتى فاكتور. ءبىز كەلىسىم ورناتۋ ءۇشىن ەلىمىزدەگى ءاربىر ايماقتان تۋريستىك قاۋىمداستىقتاردى، اگەنتتىكتەردى الىپ كەلدىك. بولاشاقتا ەكى ەل اراسىنداعى جاڭا اۆياباعىتتاردى اشۋدى جوسپارلاپ وتىرمىز»، - دەدى دۋ جياڭ.
حالىقارالىق فورۋم اياسىندا ءوڭىردىڭ تۋريزم سالاسىن دامىتۋ باعىتىندا بىرنەشە ەكىجاقتى كەلىسىمدەر جاسالاتىن بولادى.
