مەن رومانتيك ەمەسپىن. اڭگىمە

استانا. قازاقپارات - الدىڭعى ءتۇنى اي اڭىز بولدى. كادىمگى اسپانداعى اي.

«اي وتىز پايىزعا انىق كورىنەتىن ءتۇن ەكەن، بۇل جاعداي الپىس جىلدا ءبىر قايتالانادى ەكەن، عالىمدار دالەلدەپتى» دەگەن اقپاراتتار مەن سول تۇنگى ايدىڭ فوتوسى الەم-جەلىمىزدى باسىپ قالدى.

تەمپەراتۋرامنىڭ 36,6 دان اتتاپ كەتۋىنە بايلانىستى سول تۇنگى ايدى فەيسبۋكتان عانا تاماشالاۋىما تۋرا كەلدى. ونىڭ ۇستىنە، ەستي سالا دالاعا اتىپ شىعىپ ءمااا دەيتىندەي رومانتيك تە ەمەسپىز، قازىر. ءسال كۇتسەم ءوزى دە تەرەزەمنىڭ تۇسىنان وتەر دەپ كۇتىپ جاتقان كۇيى ۇيىقتاپ كەتىپپىن. سودان ءتۇننىڭ ءبىر ۋاعىندا ويانىپ كەتىپ، تەرەزەگە قاراسام... ءوزى دە جايمەندەپ ءوتىپ بارا جاتىر ەكەن. سىرت ەتكىزىپ ءتۇسىرىپ الدىم. ادەمى كادر بولدى. فوتونى ۇلكەيتىپ قاراساڭىزدار، كورەسىزدەر.

اي، ەسىكتىڭ الدىنداعى جاس تالدىڭ بۇتاقتارىنىڭ اراسىنان سىعالاپ تۇر ەكەن. كادىمگى اي. وتىز پايىزعا انىق كورىنگەن دانەڭەسى جوق. الماتىنىڭ ايعىز اسپانىمەن اياڭداي باسىپ بارا جاتقان بۇلىڭعىر اي. جەرگە سونشالىقتى جاقىنداپ كەتكەن دە ەشتەمەسىن بايقامادىم. نە مەن شىنىمەن ەشكىمگە عاشىق ەمەسپىن، نە كوزىمنىڭ كورۋى وتىز پايىزعا تومەندەگەن. ويتكەنى، اي ماعان بۇرىنعىداي-اق كورىندى. ال، ءبىزدىڭ اۋىلدا قالاي ەدى...

ءبىزدىڭ اۋىل -  اسپانعا ەڭ جاقىن اۋىل. قازاقيانىڭ ەڭ بيىك نۇكتەسى -  حان-ءتاڭىرى شىڭى. بيىكتىگى 6995 مەتر. قۋ جەتىسپەۋشىلىك-اي. ايتەۋىر، نە نارسە بولسا دا ءسال جەتپەي تۇرادى عوي. ەندى دەيمىن دا، بەس مەتر بولعاندا جەتى مىڭ مەتر بولاتىن ەدى-اۋ. نەمەسە تەڭىز دەڭگەيى بەس مەترگە تومەن بولا سالعاندا عوي. ءجا، جارايدى، ماسەلە وندا ەمەس. ايتپاعىم، ءبىزدىڭ اۋىل سول حان-ءتاڭىرىنىڭ تۋرا ەتەگىندە ورنالاسقان.

بالاعىمىزبەن بۇلت كەشىپ وسكەن ءبىز ءۇشىن اسپانداعى ايىڭىز قول سوزىم جەردە. جۇلدىزداردىڭ ءبارى انىق كورىنەدى. جەتى-سەگىز مەتردەي بيىكتە جىمىڭداپ تۇراتىن. ءتۇن ىشىندە ەرىگىپ ءجۇرىپ قىزعا بارا قالساق، قايسىسىن الىپ بەرەيىن دەپ بالسىنەتىنبىز. و نەمە دە قيال، انەبىرەۋىن الىپ بەرشى دەيتىن، ەرەكشە جارقىراعان بىرەۋىن قولىمەن نۇسقاپ.

- جۇلدىزدى، ايدى قولمەن كورسەتۋگە بولمايدى، - دەپ تيىپ تاستايسىڭ.

ول سول قىلىعىن جۋىپ-شايماق بولىپ، جاڭاعى سۇق ساۋساعىن اياعىنىڭ ۇشىمەن اۋىرعانشا باساتىن. (سول نە ىرىم ەكەن دەيم دا). ءيا، سۇق ساۋساعىن اياعىنىڭ ۇشىمەن باساتىن. اياعىندا تابالدىرىقتا جاتقان جەرىنەن اركىم ءبىر كيىپ كەتە بەرەتىن گالوش. ول كالوشپەن كىم ايدا بارمادى دەسەڭشى. اتاسى قورانىڭ قيىن تازالادى، اجەسى اجەتحاناعا كيىپ باردى دەگەندەي عوي. ەندى مىنا قىزدىڭ ىستەپ تۇرعانى مىناۋ.

قازىر، سالدەن كەيىن، كۇندەگى ادەتىنە باسىپ، ساۋساعىمدى ءسۇيشى دەمەسە ەكەن دەپ تۇراسىڭ. ەشە ءوزى تاماعىم اۋىرىپ قاپتى دەپ قويدىڭ مايىن جاعىپ شىققان. ءيىسى الەمدى الىپ بارادى. ءجا، اڭگىمە ول جايلى ەمەس ەدى عوي.

ءيا، ءبىزدىڭ اۋىلدىڭ اسپانى تاپ-تازا بولاتىن. كىرشىكسىز ەدى. ايىڭىز الپىس جىلدا ءبىر رەت ەمەس، التى كۇننىڭ بىرىندە وسى ماڭدا جۇرەدى. ءولى ارا كەزدىڭ باسقاسىنىڭ بارىندە انىق كورىنەدى. نۇرلى، شۋاقتى ەدى. قاراپ وتىراتىنمىن. جۇلدىزدار ءتىپتى كەرەمەت ەدى.

اي دەمەكشى، ءبىر ايدا وتىز كۇن بولسا، سول وتىز كۇنىڭىز وتىز كۇن ەدى-اۋ. اسىقپاي وتەتىن. سودان بولسا كەرەك، ادامدار دا اسىقپايتىن. بۇگىنگىدەي، الماتىداعىداي الاشاپقىن تىرلىك جوق ەدى. الماتىدا اينالدىرعان بەس-التى كۇندە بىرەۋلەر ۇيلەنىپ، بىرەۋلەر اجىراسىپ، اجىراسقاندار قايتا قوسىلىپ، قايتا قوسىلعاندار قايتادان قوسىلىپ جاتادى.

تاڭەرتەڭگى اقپاراتىڭ تۇستە ەسكىرىپ قالا بەرەدى. اۋىلدا قالاي ەدى. جاقىپبايدىڭ جىلىنا سويعان جىلقىنىڭ بەس ەلى قازىسى، جەتكەرگەن قايتىس بولىپ، سونىڭ قوناقاسىنا سويعان مالدىڭ ەتى كوپ قايناعاندىقتان قاتىپ قالعانعا دەيىن جىر بولاتىن ەدى عوي.

 - مولداسان نارىنقولعا بارىپ كەلىپ ىستەيدى ەكەن، وسىنىڭ شىقپاي جۇرگەن جانى-اي، - دەۋشى ەدى، ۇلكەندەر جاعى تاڭداي قاعىپ. ءبىز دە تاڭقالاتىنبىز. ءماسساعان، كۇندە بارىپ كەلەدى دەپ.

سويتسەك نارىنقولىڭىز سەگىز-اق شاقىرىم ەكەن عوي. قازىر ءبىز كۇنىگە سەكسەن شاقىرىم ءجۇرىپ تاستايمىز. ەگەر بىرەۋ كەگەنگە بارىپ كەلسە، اھىلاپ-ۇھىلەپ قاتىنىنا جان تاپتىرمايتىن. تاماعىڭ ءالى دايىن ەمەس پە دەپ. ويتكەنى كەگەنگە بارىپ كەلگەن عوي. ال كەگەنىڭىز بارىپ كەلگەن جولىن قوسىپ ەسەپتەپ، اسىرا ايتتى دەگەن كۇننىڭ وزىندە ەكى ءجۇز كەلەمەترگە جەتەر-جەتپەس جەر. ە قويشى تەگى. ال، الدا-جالدا الماتىعا جۇرەتىندەر بولسا، ءتىپتى جىر قىلىپ جىبەرەتىن. بايىنقولدىڭ جاعاسىنا بارىپ، ماشيناسىن جۋىپ، ونى ورتالىق كوشەمەن ءجۇرىپ، شاڭعا تيگىزبەي كەپتىرىپ دەگەندەي. ويپىرموي. ماگەزىننىڭ الدىنا توقتاپ، ءبىر پاشكى قازاقستان الىپ، ونى قيسىعىنان تىستەپ تارتىپ تۇراتىن ەدى. ارى-بەرى وتكەندەرگە داقپىرتاتىن.

- جارقىراتىپ قويپسىڭ عوي.

- ەرتەڭ قالاعا جۇرمەكپىن.

- قاشان قايتپاقسىڭ؟

 - ەكى قونىپ قايتامىن عوي.

- نە شارۋامەن؟

- اۋكەننىڭ بالاسىنىڭ تويىنىڭ پىرادۋتىسىنە.

- ا- ا- ا.

 ءبىر-بىرىنەن زاپاسكا سۇراعاندارى دا جىر. سونداعى ايعا ۇشقانداي جىر قىلاتىن الماتى دەگەنىڭىز 347 ك م ەكەن. قازىر 500 ك م ءبىر جەرگە بارىپ كەلسەڭ، كورشىڭ تۇگىلى، ايەلىڭ دە بايقاماي قالادى.

ءيا، اۋىلدا ءومىر ەرتەگىدەي ەدى. ۋاقىت اسىقپاي وتەتىن. اسپان ءموپ-ءمولدىر بولاتىن. اۋا تازا ەدى. مەن رومانتيك بولاتىنمىن. قازىر قاربالاس قالادا، جانتالاسقان زاماندا توبەمىزدە اسپان بارىن ۇمىتىپ كەتتىك-اۋ. ءيا، توبەمىزدە اسپان بار ەكەن، اسپاندا اي بار ەكەن. ماشاللا. تەك قانا كوزگە جاس الما. مىنا زاماندا رومانتيكتەرگە ورىن جوق. اسپانعا قاراپ جۇرسەڭ اۋىش دەيدى. مەن رومانتيك ەمەسپىن...

 بەيبىت سارىباي