الەمدە جالعىز ۇلگىسى ساقتالعان شىڭعىس حان اتىمەن سامارقاندا سوعىلعان التىن دينار

شىمكەنت. قازاقپارات - تۇركىستاندا «ۇلتتىق ۆاليۋتا كۇنى» قارساڭىندا «تاۋەلسىزدىك نىشانى - ءتول تەڭگە» اتتى كورمەنىڭ اشىلۋ سالتاناتى ءوتتى.

  قوجا احمەت ياساۋي كەسەنەسىندە ۇيىمداستىرىلعان كورمەگە وتىرار قورىق- مۋزەيى مەن ءنازىر تورەقۇلوۆ مۋزەيى تاريحي- مادەني ەتنوگرافيالىق ورتالىعىنىڭ قىزمەتكەرلەرى، قالالىق ارداگەرلەر كەڭەسى مەن قازاق ءتىلى قوعامىنىڭ مۇشەلەرى، سونداي- اق مەكتەپ وقۋشىلارى مەن ۇستازدار، قالا تۇرعىندارى مەن قوناقتارى قاتىستى، دەپ حابارلايدى قازاقپارات ءتىلشىسى.

«ازىرەت سۇلتان» مەملەكەتتىك تاريحي- مادەني قورىق- مۋزەيىنىڭ باستاماسىمەن وتكەن شارا ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» ماقالاسى اياسىندا ۇيىمداستىرىلدى.

«تاۋەلسىزدىك نىشانى - ءتول تەڭگە» كورمەسى قازاق جەرىندە سوعىلىپ، اينالىمدا جۇرگەن اقشا تۇرلەرى جانە 1993 -جىلى اينالىمعا جىبەرىلگەن تەڭگە بانكنوتتارى مەن مونەتالاردىڭ ۇلگىلەرى، تەڭگەنىڭ ەۆوليۋتسيالىق دامۋ بارىسىنداعى ۇلگىلەرى مەن قازاقستان ۇلتتىق بانكىنىڭ كوللەكتسيالىق تەڭگەلەرى سىندى بەس بولىمنەن تۇرادى. سان عاسىرلىق تاريحي كەزەڭدەردى قامتيتىن كورمەدە قازاق جەرىندە مەكەن ەتكەن تۇركى مەملەكەتتەرىنىڭ اقشا تۇرلەرى تانىستىرىلدى. تاۋەلسىزدىگىمىزدىڭ جارشىسى بولعان تەڭگەلەردىڭ 1993 -جىلعى العاشقىلارىنان باستاپ، بۇگىنگى تاڭعا دەيىنگى دامۋ تاريحىنان حابار بەرەتىن ۇلگىلەرى كوپشىلىك نازارىنا ۇسىنىلدى. ماسەلەن، قازىرگى تاڭدا الەمدەگى جالعىز ۇلگىسى عانا بەلگىلى بولىپ وتىرعان شىڭعىس حان اتىمەن سامارقاندا سوعىلعان التىن دينار جانە بۇگىنگى تاڭعا دەيىن بەلگىسىز بولىپ كەلگەن تىڭ جاڭالىق - جاڭگىر حان تۇسىندا سوعىلعان مىس اقشا دا جۇرتشىلىق نازارىنا ۇسىنىلدى. عالىمدار مۋزەي قورىندا ساقتالعان، سامارقاند اقشا سارايىندا جاسالعان دينار قازىرگى كۇندە تيپولوگيالىق تۇرعىدا الەمدەگى جالعىز اقشا دەپ وتىر.

نۋميزماتيكا تاريحىندا قازاق حاندارى اراسىندا ءوز اتىنان اقشا سوقتىرعان تەك تۇرسىن مۇحاممەد حاننىڭ تەڭگەلەرى عانا بەلگىلى بولىپ كەلگەن بولسا، سالقام جاڭگىر حانعا ارناپ جاسالعان تەڭگەنىڭ تابىلۋى دا ايتارلىقتاي جاڭالىققا يە. قازاق نۋميزماتيكاسىنىڭ تاريحىنا جاڭاشا كوزقاراسپەن قاراۋعا مۇمكىندىك بەرەتىن بۇل تيىن ۇلگىسى وتە سيرەك كەزدەسەتىن اقشالار قاتارىنان ورىن الادى.

 ايتا كەتەيىك، «ازىرەت سۇلتان» قورىق- مۋزەيىنىڭ نۋميزماتيكالىق قورىندا بۇگىنگى تاڭدا 13 مىڭنان اسا جادىگەر ساقتاۋلى.

 اۆتور: اينۇر اقبايەۆا