قازاقستان پرەزيدەنتى كونستانتين ەرنستتى وردەنمەن ماراپاتتادى
ماراپاتتاۋ استانا كلۋبىنىڭ ءۇشىنشى وتىرىسىنىڭ سوڭىندا بولدى. بۇعان دەيىن حابارلانعانداي، ەلباسى استانا كلۋبى ەۋرازيا قۇرلىعىنىڭ بولاشاعى ءۇشىن وزەكتى ماسەلەلەردى كەڭ اۋقىمدى ساراپتامالىق دەڭگەيدە تالقىعا سالاتىن بىرەگەي وڭىرلىك باس قوسۋ الاڭى ەكەنىن اتاپ ءوتتى.
نۇرسۇلتان نازاربايەۆ استانا كلۋبىنىڭ جۇمىسى اياسىندا قازىرگى زاماننىڭ تۇيتكىلدى ماسەلەلەرىن شەشۋدىڭ ءتيىمدى جولدارىن تابۋعا بولاتىنىن ايتتى.
- ءبىز الەمگە سوڭعى ۋاقىتتا جەتىسپەي جاتقان نارسەنى بەرگىمىز كەلەدى. بۇل دەگەنىمىز - جاھاندىق مىندەتتەردى شەشۋ ءۇشىن بىرىگۋ، اۋىزبىرشىلىك پەن تولەرانتتىلىق تانىتۋ، - دەدى قازاقستان پرەزيدەنتى.
مەملەكەت باسشىسى حالىقارالىق تەرروريزم مەن ەكسترەميزمنىڭ كۇشەيۋىنە اكەپ سوقتىراتىن الەمدەگى گەوساياسي جانە يدەولوگيالىق كۇيرەۋدىڭ بەلەڭ الىپ كەلە جاتقانىن ايتتى.
- جاھاندىق دامۋدىڭ جاڭا بەتالىسى شىعىس - باتىس باعىتى بويىنشا گەوساياسي، گەوەكونوميكالىق جانە گەويدەولوگيالىق كۇيرەۋدىڭ بەلەڭ الۋى جاعدايىندا ءجۇرىپ جاتىر. ساياسي قۋعىن-سۇرگىن، جوقشىلىق، ءبىلىم بەرۋ مەن دەنساۋلىق ساقتاۋ دەڭگەيىنىڭ تومەندىگى حالىقارالىق تەرروريزم مەن ەكسترەميزمنىڭ كۇشەيۋىنە سەبەپشى بولىپ وتىر، - دەدى ەلباسى.
سونىمەن قاتار، نۇرسۇلتان نازاربايەۆ وڭىرلىك جانە حالىقارالىق قاۋىپسىزدىكتىڭ قازىرگى جۇيەسىندە ءبىرقاتار ماسەلەلەردىڭ بار ەكەنىن اتاپ ءوتتى. بۇل ماسەلەلەر الەمنىڭ ەكونوميكالىق جانە تەحنولوگيالىق كەڭىستىگىن بولە-جارىپ، قاۋىپ توندىرەتىن سانكتسيالىق تەكەتىرەسپەن بايلانىستى بولىپ وتىر. قازاقستان پرەزيدەنتى جاھاندىق شيەلەنىستىڭ كۇشەيۋىنە اسەر ەتەتىن ميليتاريستىك پيعىلدىڭ تارالۋىن، قارۋلانۋ ۇدەرىسىنىڭ ارتىپ كەلە جاتقانىن، سونداي-اق يادرولىق قارۋدى قولدانۋ ءقاۋپىنىڭ قايتا پايدا بولعانىن ايتتى.
بۇل رەتتە، حالىقارالىق تەرروريزم مەن ەكسترەميزم اپاتتىق اۋقىمعا يە بولعانىن اتاپ ءوتتى. بۇدان بولەك، مەملەكەت باسشىسى سوڭعى 25 جىلدا الەمدەگى حالىقارالىق ميگرانتتاردىڭ سانى ەكى ەسە ءوسىپ، بۇگىندە 250 ميلليون ادامنان اسقانىن اتاپ ءوتىپ، باقىلاۋعا كەلمەيتىن جاھاندىق كوشى-قون ماسەلەسىنە نازار اۋداردى.
جاھاندىق دەڭگەيدە حالىق سانىنىڭ ءوسۋى ازىق-تۇلىك رەسۋرستارى تاپشىلىعىن وزەكتى ماسەلەلەر قاتارىنا قوسۋدا. قازاقستان پرەزيدەنتى اتالعان ماسەلەلەردى شەشۋ ءۇشىن ەۋرازيا قۇرلىعى قاۋىپسىزدىك، ەكونوميكالىق ءوسىم مەن ديالوگ سالاسىندا بىرىكتىرۋشى كۇن ءتارتىبىن ۇسىنا الاتىنىن ايتتى. نۇرسۇلتان نازاربايەۆ «ءبىر بەلدەۋ، ءبىر جول»، ەۋرازيالىق ەكونوميكالىق وداق، شاڭحاي ىنتىماقتاستىق ۇيىمىنىڭ ەكونوميكالىق ولشەمى باستامالارىن، «نۇرلى جول» باعدارلاماسىن جانە باسقا دا جوبالاردى ىسكە اسىرۋ ەۋرازيا قۇرلىعىنىڭ جاڭا گەوەكونوميكالىق كەسكىندەمەسىن جاساۋعا مۇمكىندىك بەرەتىنىن اتاپ ءوتتى.
سوڭىندا مەملەكەت باسشىسى جيىندا بولعان پىكىرتالاس ورنىقتى جاھاندىق دامۋ ماقساتىندا ءارى قاراي ناقتى شەشىمدەر قابىلداۋ ءۇشىن سەپتىگىن تيگىزەتىنىنە سەنىم ءبىلدىردى.
