قازاق جىگىتى موڭعوليا قۇراماسى تاريحىندا تۇڭعىش بولىپ حەت-تريك جاسادى
بۇعان دەيىن موڭعوليا فۋتبول تاريحىندا مەيلى جاستار بولسىن، مەيلى ۇلتتىق قۇراما ساپىندا بولسىن، ەشكىم رەسمي كەزدەسۋلەردە ءۇش گول سوعىپ، حەت- تريك جاساماعان.
جانسەرىك ماراتحان ۇلى حەت-تريكتى ازيا بىرىنشىلىگىنىڭ جاستار اراسىنداعى (19 جاسقا دەيىنگى) ىرىكتەۋ كەزەڭىندە سينگاپۋر قۇراماسىنا قارسى ويىندا جاسادى.
ال ويىن جالپى 4:2 ەسەبىمەن موڭعول جاستارىنىڭ جەڭىسىمەن اياقتالدى. كەزدەسۋ بارىسىندا موڭعوليا قۇراماسى 0:2 ەسەبىمەن جەڭىلىپ جاتقان. سودان سوڭ ماراتحان ۇلى كومانداسىنا جەڭىسكە جەتۋگە كومەكتەستى.
ءبىرىنشى تايمنىڭ سوڭىندا ول پەنالتيدى ءساتتى ورىنداسا، ەكىنشى تايمدا قارسى شابۋىلدان، ال ءۇشىنشى گولدى ويىننىڭ اياقتالۋىنا ءۇش مينۋت قالعاندا سوقتى. ويىن سوڭىندا سينگاپۋر قۇراماسىنىڭ ەكى فۋتبولشىسى قىزىل قاعاز السا، قوسالقى قۇرامدا وتىرعان تاعى ءبىر ويىنشى الاڭنان قۋىلدى.
وسىلايشا موڭعوليا قۇراماسى سان باسىمدىعىن ءساتتى پايدالانىپ، قوسىمشا ۋاقىتتا ءتورتىنشى گولدى سوقتى. دەگەنمەن دە بۇل جەڭىس موڭعوليا جاستار قۇراماسىن كەلەسى كەزەڭگە الىپ شىقپادى. ويتكەنى، بۇعان دەيىن ولار جاپونيا قۇراماسى (0:7) مەن تايلاندتان (2:5) جەڭىلىپ قالعان ەدى.
18 جاستاعى جانسەرىك ماراتحان ۇلى قازىرگى ۋاقىتتا ەلدىڭ باس شاھارى ۇلان-باتور قالاسىندا تۇرىپ، جەرگىلىكتى "دەرەن" كلۋبىندا ونەر كورسەتەدى. وتكەن جىلى ول موڭعوليا ۇلتتىق قۇراماسىنا دا شاقىرتۋ الىپ، قۇراما تاريحىنداعى ەڭ جاس ويىنشى اتاندى. ءبىراق ۇلتتىق قۇراماسى ءۇشىن ءالى بىردە-ءبىر كەزدەسۋگە قاتىسقان جوق.
