قازاقستان قىتايعا ءىرى قارا مال باسىن تىرىدەي ەكسپورتتاماق
جوبا 2018-2024 -جىلدارعا ارنالعان ينۆەستيتسيالىق باعدارلامانى جۇزەگە اسىرۋ بويىنشا ىسكە اسپاق، دەپ حابارلايدى «قازاقپارات» ح ا ا قىتايداعى مەنشىكتى ءتىلشىسى.
قۇجاتقا ق ر پرەمەر- ءمينيسترىنىڭ ورىنباسارى - اۋىل شارۋاشىلىعى ءمينيسترى اسقار مىرزاحمەتوۆتىڭ ق ح ر- ىنا جۇمىس ساپارى اياسىندا قول قويىلدى. ول ق ر ەكونوميكاسىنا 600 ميلليون دوللار قىتاي ينۆەستيتسياسىن تارتۋدى كوزدەيدى.
«تارتىلعان ينۆەستيتسيا ەڭ الدىمەن قازاقستاندا مال سانىن كوبەيتۋگە جۇمسالادى. ءبىز شامامەن جىل سايىن قىتايعا 240 مىڭ باس ءىرى جانە ۇساق ءتىرى مال جىبەرۋدى جوسپارلاپ وتىرمىز. بۇل مەملەكەت جۇرگىزگەن قىرۋار جۇمىستىڭ زاڭدى ناتيجەسى - بارلىق زامان تالاپتارىنا ساي ينفراقۇرىلىمدار سالىندى، ولار اۆستراليالىق نەمەسە امەريكالىق تەحنولوگيالاردان ەش كەم تۇسپەيدى»، - دەدى «قازاقستان ەت وداعى» ز ت ب- ءىنىڭ باسشىسى ماقسۇت باقتىبايەۆ قازاقپاراتقا بەرگەن سۇحباتىندا.
ونىڭ ايتۋىنشا 2010-2015 -جىلدارداعى شەتەلدەردەن اكەلىنگەن مال تۇقىمى قازاقستاندا وندىرىلەتىن ەت ساپاسىن جاقسارتتى.
«قازىر ءبىز ۇسىنىپ وتىرعان مال ساپاسى جاعىنان قىتاي جىل سايىن 2 ميلليون باس يمپورتتاپ وتىرعان اۆستراليا مالىنان كەم تۇسپەيدى. بۇل باستاما الداعى 5-7 جىل ىشىندە قازاقستانداعى ءىرى جانە شاعىن فەرمەرلىكتىڭ دامۋىنا ۇلەس قوسادى»، - دەدى م. باقتىبايەۆ.
